Jetisý oblysynda polıtseıler úıinde fıtozerthana uıymdastyrǵan turǵyndy quryqtady

TALDYQORǴAN. KAZINFORM – Jetisý oblysynda «Qarasora-2025» respýblıkalyq jedel-aldyn alý is-sharasy aıasynda esirtki qylmystaryna qarsy is-qımyl basqarmasynyń qyzmetkerleri esirtki taratý arnasyn áshkerelep, onyń jolyn kesti. 

Operatsııa barysynda jedel baqylaý uıymdastyrylyp, erekshe ıisi bar, jasyl tústi ósimdik tektes zat salynǵan zip-paketter jasyrylǵan eki snek qaptamasy satyp alyndy. Sot-hımııalyq saraptamanyń qorytyndysy boıynsha tárkilengen zat — jalpy salmaǵy 2,5 gramm bolatyn marıhýana bolyp shyqty. Kúdiktiniń 36 jastaǵy Taldyqorǵan qalasynyń turǵyny ekeni anyqtalǵannan keıin, onyń turǵylyqty mekenjaıynda tintý júrgizildi.

Nátıjesinde mynandaı zattar tabylyp, tárkilendi: belgisiz tuqymdar salynǵan 3 plastık jáne 4 polıetılen qaptama; qoldan jasalǵan esirtki shegýge arnalǵan qurylǵy; qońyr tústi untaq salynǵan zip-paket; tyńaıtqysh quıylǵan 7 bótelke; syrtqy pishini qarasoraǵa uqsas ósimdik egilgen 2 gúlsaýyt.

Saraptama nátıjeleri boıynsha alynǵan ósimdikterdiń 18 gramy keptirilmegen qarasora, al 34 gramy keptirilgen marıhýana ekeni anyqtaldy. Sonymen qatar materıaldardan kannabıs tektes ózge de esirtki zattary tirkeldi. 

Tergeý barysynda kúdiktiniń úıinde esirtki quramyndaǵy ósimdikterdi ósirýge arnalǵan arnaıy fıtozerthana uıymdastyrylǵany belgili boldy. Onda tyńaıtqyshtar men jaryqtandyrý quraldary qoldanylǵan. Ósirý nátıjesinde alynǵan ónim azyq-túlik qaptamalaryna jasyryla otyryp, tutynýshylarǵa ótkizilgen. 

Atalǵan fakti boıynsha sotqa deıingi tergep-tekserý amaldary júrgizilip jatyr. Kúdikti qamaýǵa alyndy.

Esirtki zattaryn zańsyz satyp alý, saqtaý, tasymaldaý, ótkizý nemese satý – Qazaqstan Respýblıkasy Qylmystyq kodeksine sáıkes aýyr qylmys sanalady. Mundaı áreketter úshin múlkin tárkileı otyryp, 5 jyldan 8 jylǵa deıin bas bostandyǵynan aıyrý jazasy qarastyrylǵanyn eske salamyz.

Buǵan deıin Jetisý oblysynda zańsyz jumys istegen qoqys polıgony anyqtalǵanyn habarlaǵan edik.