Jetisý oblysynda polıtseı tútin basqan úıge kirip, úsh balany qutqaryp qaldy
ASTANA. KAZINFORM — Jetisý oblysynda polıtseı tútin basqan úıden úsh balany qutqardy.
ІІM baspasóz qyzmetiniń málimetinshe, 7 mamyr – Otan qorǵaýshylar kúni Taldyqorǵan qalasynda erlik pen janqııarlyqtyń aıǵaǵyna aınalǵan oqıǵa boldy. Polıtsııa maıory Mıras Daýtov qyzmetten tys ýaqytta, Kókbastaý kóshesimen ótip bara jatyp, kómek suraǵan adamnyń daýsyn estıdi.
Kóshede turǵan er adam eki qabatty turǵyn úıde qatty tútin paıda bolyp, ishinde balalar qalyp qoıǵanyn aıtyp, kómekke shaqyrǵan. Oılanbastan Mıras Daýtov gaz qyzmetkerimen birge tútinge oranǵan úıge kiredi. Óz ómirine qaýip tóngenine qaramastan, olar 9 ben 13 jas aralyǵyndaǵy úsh balany aman-esen syrtqa alyp shyqqan. Jedel árekettiń nátıjesinde qaıǵyly oqıǵanyń aldy alyndy.
Polıtseı, gaz qyzmeti jáne órt sóndirýshilerdiń úılesimdi jumysynyń arqasynda tútinniń kózi jyldam joıyldy. Qýanyshqa oraı, eresekter arasynda zardap shekkender joq.
Mıras Daýtovtyń bul erligi – óz halqyna adal qyzmet etýdiń, ofıtserlik abyroı men antyna adaldyqtyń jarqyn kórinisi. Otan qorǵaýshylar kúni ol naǵyz batyrlyqtyń ne ekenin ispen dáleldedi.
Buǵan deıin Jetisý oblysynda qutqarýshylar órtengen úıden qart adamdy aman alyp shyqqanyn jazǵan bolatynbyz.