Jetisý oblysynda ótken Prezıdent shyrshasyna 200 bala qatysty
Taldyqorǵandaǵy «Jastar» Sport saraıynda oblys ákimi Beıbit Isabaevtyń qatysýymen «Qosh keldiń, Jańa jyl!» atty Prezıdenttik shyrsha toıy ótti, dep habarlaıdy Kazinform.
Prezıdent shyrshasyna oblystaǵy kópbalaly, az qamtylǵan, tolyq emes otbasylarynan shyqqan oqý ozattary, erekshe qajettiligi bar balalar, jetim balalar jáne «Aınalaıyn» balalar úıiniń tárbıelenýshileri qataryndaǵy 200 bala qatysty.
Merekelik shara jetisýlyq balalar óner ujymdarynyń birlesip fleshmob bıleýmen bastaldy. Munan soń Prezıdent Qasym-Jomart Toqaevtyń balalarǵa arnaǵan quttyqtaý haty úlken ekrannan kórsetildi.
Quttyqtaý hatta:
«Aınalaıyn balaqaı! Seni Jańa jyl merekesimen quttyqtaımyn! Osy tamasha meırem ózińdi qýanysh pen shattyqqa bólesin! Ómiriń jarqyn sátterge toly bolsyn! Kitap oqy, sportpen shuǵyldan, tabıǵatty aıala jáne jaqsylyq jasaýǵa umtyl! Bilimpaz, eńbekqor, adal azamat bol! Asqaq armandaryń aqıqatqa aınalsyn! Saǵan zor densaýlyq, tolaǵaı tabys tileımin!», - delingen.
Merekede oblys ákimi Beıbit Isabaev ta balalardy jańa jyl merekesimen quttyqtady:
«Búgingi Prezıdent shyrshasyna tek qana jaqsy oqyǵan, úlgili, tártipti, ónerli balalar shaqyrylady. Col úzdikterdiń qatarynda ózderińniń bolǵandaryńa qýanamyz. Aldaǵy ýaqytta da jaqsy bilim alyp, talanttaryńdy shyńdap, aıtýly azamat bolyńdar. Jańa jylda arman-tilekteriń oryndalyp, jeńisterge jete berińder!», - dedi Beıbit Isabaev.
Merekede B. Rımova atyndaǵy drama teatrynyń ártisteri, oblystyq D. Raqyshev atyndaǵy fılarmonııanyń ónerpazdary, Taldyqorǵandaǵy Oqýshylar saraıynyń jáne aýdan-qalalardaǵy teatr jáne basqa da óner úıirmeleriniń qatysýshylary, tsırk oıynshylary, anımatorlar, trıýk jasaýshylar, akrobattar jáne basqa da ónerpazdar merekeniń kórigin qyzdyrdy.
Jas kórermender eski Qoıan jylyn shyǵaryp salyp, jańa Ulý jylyn qarsy aldy. Balalar Aıaz Atamen jáne Aqshaqarmen, shyrsha merekesine kelgen qonaqtarmen birge shyrshany aınalyp, án saldy, oıyn oınap, túrli jumbaqtar sheshti. «Tátti ústelge» qoıylǵan torttan dám tatty.
Merekege arnaıy shaqyrylǵan 200 balaǵa qystyq kıimder men sporttyq kıimder jıyntyǵy, táttiler men kitaptar syıǵa tartyldy.
