Jetisý oblysynda órt oqıǵalary kóbeıdi

TALDYQORǴAN.KAZINFORM – Jetisý oblysynda turǵyn úı sektoryndaǵy órt oqıǵalary alańdaýshylyq týǵyzyp otyr. Ótken jylytý maýsymynda 187 órt tirkelip, 14 adam kóz jumǵan. Atalǵan kórsetkish ótken jylmen salystyrǵanda 36 paıyzǵa joǵary.

Bul másele jóninde Óńirlik kommýnıkatsııalar qyzmetinde ótken baspasóz máslıhatynda oblystyq Energetıka jáne turǵyn úı-kommýnaldyq sharýashylyq basqarmasynyń basshysy Aıdos Beketaev baıandady. 

– Órtterdiń negizgi sebepteri eski peshter, qaýipti elektr jelileri men tehnıkalyq aqaýlar. Bul máseleni sheshý úshin keshendi sharalar qolǵa alyndy, – dedi basqarma basshysy.

Osyǵan oraı 15 tamyz ben 1 qazan aralyǵynda oblysta «Órt qaýipsizdigi aılyǵy» jarııalandy. 

Bul kezeńde túsindirý jumystary, aldyn alý sharalary, sondaı-aq áleýmettik osal otbasylarǵa datchıkter ornatý júrgiziledi.

– Byltyr 936 otbasynyń úıine tútin jáne gaz datchıkteri ornatyldy. Bıyl bul jumys jalǵasyn tabady, – dedi spıker.

Sonymen qatar Tótenshe jaǵdaılar departamenti turǵyndarǵa peshterdi jóndeýdi, murjalardy tazalaýdy jáne eski symdardy aýystyrýdy jylytý maýsymy bastalǵanǵa deıin aıaqtaýǵa shaqyryp otyr.

Eske salaıyq, jeke turǵyn úıde órt oqıǵalarynyń kóbeıýiniń birneshe sebebi aıtylǵanyn jazǵanbyz.