Jetisý oblysynda óńirdegi alǵashqy kórkem gımnastıka zaly qoldanysqa berildi
TALDYQORǴAN. KAZINFORM – Taldyqorǵan qalasynda Jetisý óńirindegi zamanaýı talapqa saı alǵashqy kórkem gımnastıka zaly qoldanysqa berildi. Zaldyń ashylý qýanyshymen sportshylar men qala turǵyndaryn oblys ákimi Beıbit Isabaev quttyqtady.
— Memleket basshysynyń óńirde buqaralyq sportty damytý týraly tapsyrmasyna sáıkes jyl saıyn kóptegen sport nysandary salynýda. Jetisý oblysy qurylǵannan beri 39 nysan boı kóterip, jańǵyrtyldy. Olardyń qatarynda turǵyn úıi bar voleıbol jattyǵý bazasy, ústel tennısi ortalyǵy, muz arenasy jáne búgingi ashylyp otyrǵan zamanaýı kórkem gımnastıka zaly bar. Jańa sport kesheninde jasalyp otyrǵan jaǵdaılar osy kúrdeli ári ásem sport túrine jastardy kóbirek tartýǵa yqpal etetine senimdimin, — dedi B. Isabaev.
Saltanatty lenta qııý rásiminen keıin qonaqtar jańa sport nysanynyń ishin aralap, jabdyqtalýymen tanysty. Jas sportshylarmen áńgimelesken óńir basshysy kórkem gımnastıkany damytýǵa oblysta búgingi kúni barlyq jaǵdaı jasalyp otyrǵanyn aıtyp, bolashaqta elimizdiń atyn shyǵaratyn myqty chempıon bolý úshin qajyrly eńbektenip, úzdiksiz jattyǵý kerektigin aıtty. Munan soń sport qaıratkerlerimen birge balalarǵa gımnastıka qural-jabdyqtary, sol sııaqty sporttyń basqa da túrlerine arnalǵan ınventarlar tabys etti.
Jattyqtyrýshylardyń biri Elena Belıkova kórkem gımnastıkaǵa arnalǵan jańa zal jóninde óz pikirin bildirdi:
— Jas sportshylarymyz úshin jeke jattyǵý zaly salynǵanyna qýanyshtymyz. Buǵan deıin túrli sport keshenderinde jattyǵýymyzǵa týra keldi, bul birshama jaısyzdyq týǵyzatyn. Bul máseleni oblys ákiminiń halyqpen kezdesýinde kóterdik. Sol kezde bizge bul másele nazardan tys qalmaıdy dep ýáde berdi. Búgin bizdiń armanymyz oryndaldy deýge bolady. Bul arnaıy zalda jattyǵý protsesi úshin barlyq qolaıly jaǵdaılar jasalǵan — tóbeniń bıiktigi 14 metr, jaraqattanýdy boldyrmaý úshin platformasy men gımnastıka kilemi bar aǵash eden tóselgen. Bul zaldyń ashylýy Jetisýda kórkem gımnastıkanyń damýyna, bizdiń gımnasttardyń joǵary nátıjelerge qol jetkizýine tyń serpin beredi dep oılaımyn, — dedi ol.
Jas sportshylar da óz oılaryn ortaǵa saldy:
— Men kórkem gımnastıkamen on jyldan beri shuǵyldanamyn. Buǵan deıin ártúrli sport keshenderiniń zaldarynda jattyǵyp júrdik, olardyń tóbesi alasa boldy da jattyǵýda táýekelderge barýǵa múmkindik bermeıtin. Qazir jańa zaldyń tóbesi bıik, túrli kúrdeli jattyǵýlardy jasaýǵa yńǵaıly, ıaǵnı úlken múmkindikterge jol ashyldy, endi sport sheberligin qorǵaýǵa bolady, — deıdi sport sheberligine úmitker Anastasııa Terıaeva.
Taǵy bir jas gımnastshy Aıana Murat ta osyndaı pikirde.
— Kórkem gımnastıkadan sport sheberligine úmitkermin. Sporttyń osy túrimen aınalysqanyma jeti jyl boldy. Qazirgi zalymyz jaryq, bıik, úlken. Munda kásibı daıyndyǵymyzdy shyńdap, álemdik sport jarystarynda elimizdiń týyn kókke kóteremiz dep senemin, — dedi ol.
Ana-analardyń biri Gúljanat Ýmentaeva zaldyń salynǵanyna rızashylyǵyn bildirdi.
— Meniń tórt qyzym bar. Ekinshi qyzym Aıaýlym tórt jasynan beri gımnastıkaǵa qatysady. Jastaıynan óziniń beıimi boldy, sondyqtan tanystarymnyń keńesi boıynsha gımnastıka úıirmesine berdim. Qazir segiz jyldan beri osy sport túrimen turaqty aınalysyp keledi. Qalamyzda turaqty jattyǵatyn kórkem gımnastıkanyń arnaıy zaly bolǵanyna ata-ana retinde qýanyshtymyn. Bolashaqta qyzym chempıon bolatynyna senemin, — deıdi Gúljanat.
Atap ótsek, ǵımarattyń qurylysy ótken jyldyń aqpan aıynda bastalǵan bolatyn. Munda eki zal bar, onyń biri gımnastıka jattyǵýlaryna arnalsa, ekinshisi voleıbol, basketbol, mını fýtbol oıyndaryn ótkizýge bolatyn ámbebap zal.
Jalpy, búgingi kúni Taldyqorǵanda 200-ge jýyq bala turaqty túrde kórkem gımnastıkamen aınalysady, olardy kásibı jattyqtyrýshylar jattyqtyrady.
Aıta ketelik Jetisý oblysy Dostyq aýylynda «Keleshek mektebi» ashylǵan edi.