Jetisý oblysynda nóser jaýyn saldarynan úılerdiń aýlasyn sý basty
TALDYQORǴAN. KAZINFORM — 3 tamyz kúni Jetisý oblysy Kerbulaq aýdanyna qarasty Saryózek aýylynda jaýǵan qatty nóser jaýyn saldarynan ondaǵan aýla sý astynda qaldy.
Oqıǵa ornynan túsirilgen beınejazbalar áleýmettik jelilerde jarııalandy.
Oblystyq tótenshe jaǵdaılar departamentiniń málimetinshe, jaýyn-shashynnyń kóp mólsheri saı-salalar men betkeıler arqyly aǵyp kelip, aýyldyń birneshe kóshesin sý basty.
Eń kóp zardap shekken Quljabaı bı kóshesinde jańbyr sýyn aǵyzatyn júıe jaýyn kólemin kótere almaı, sý jolǵa jaıylyp ketken. Sonymen qatar Ýálıhanov, Moldaǵulova jáne Qaısenov kóshelerinde de sý basý jaǵdaılary tirkeldi. Barlyǵy 48 aýlaǵa sý kirip, sonyń ishinde 8 turǵyn úıdiń ishine deıin jetken.
Vedomstvo ókilderi bul jaǵdaıdyń negizgi sebebi úılerdiń irgetasynyń tómen ornalasýy ekenin atap ótti.
Saǵat 22:10–da sý sorý jumystary tolyq aıaqtaldy. Qaza tapqandar men zardap shekkender joq.
Kólik qozǵalysy shektelmegen.
Oqıǵa ornyna tótenshe jaǵdaılar departamentiniń jáne jergilikti atqarýshy organdardyń kúshteri jedel túrde jumyldyryldy. Qazirgi ýaqytta jaǵdaı tolyq baqylaýǵa alynǵan.
Aıta keteıik, Qazaqstan men AQSh sý tasqynyn boljaıtyn ozyq tehnologııalardy engizý máselesin talqylaǵan bolatyn.