Jetisý oblysynda nóser jaýyn kópirdi shaıyp ketti
ASTANA.KAZINFORM - Taýly Panfılov aýdanynda nóser jaýynnan Býrhan ózeniniń sý deńgeıi kúrt kóterilip ketti. Saldarynan «Jarkent-Taldy» aımaqtyq tas jolyndaǵy kópirdiń irgetasyn sý shaıyp, kólik qozǵalysyna ýaqytsha shekteý qoıyldy.
Jetisý oblystyq Tótenshe jaǵdaılar departamentiniń málimetinshe, 9 shilde kúni saǵat 14:24 kezindegi nóser jaýyn men selden Býrhan ózenindegi sý deńgeıi sekýndyna 0,7-den 15 tekshe metrge deıin artyp, shekti deńgeıge jetti.
Bul «Jarkent-Taldy» aımaqtyq tas jolynyń úshinshi shaqyrymyndaǵy kópir irgetasynyń qıraýyna ákep soqty.
Qaýipsizdikti qamtamasyz etý úshin joldyń 0 shaqyrymynan 27 shaqyrymyna deıingi bóligindegi kólik qozǵalysy ýaqytsha toqtatyldy. Áýlıeaǵash aýyly arqyly balama jol quryldy.
- 10 shilde kúni tańerteń sý deńgeıi tómendegennen keıin mamandar jóndeý jáne qalpyna keltirý jumystaryn bastady. Saǵat 12:00-degi jaǵdaı boıynsha «Jarkent-Taldy» aımaqtyq tas joly barlyq kólik túri úshin tolyqtaı ashyq, - dep habarlady oblystyq Tótenshe jaǵdaılar departamenti.
Buǵan deıin Almaty oblysynda Aqsaı ózeniniń tasýynan sý jelisi zaqymdanǵan bolatyn.
