Jetisý oblysynda múgedektigi bar balalardyń ata-analarynan zańsyz ustalǵan salyq qaıtaryldy
TALDYQORǴAN. KAZINFORM - Jetisý prokýratýrasy múgedektigi bar balalardyń ata-analary men qamqorshylarynan jeke tabys salyǵynyń zańsyz ustalǵanyn anyqtady.
Oblystyq prokýratýranyń málimetinshe, tekserý nátıjesinde 2 mln teńgeden astam qarajat qaıtarylyp, jaýapty tulǵalar tártiptik jazaǵa tartyldy.
«Qazaqstan Respýblıkasynyń zańnamasyna sáıkes múgedektigi bar balalardyń ata-analary men qamqorshylary jeke tabys salyǵyn tóleýden bosatylǵan. Alaıda, Kerbulaq aýdany boıynsha Memlekettik kirister basqarmasy Salyq kodeksiniń 346-baby 1-bóliginiń 3) tarmaǵynyń talaptaryna qaıshy kele otyryp, atalǵan azamattardan negizsiz salyq ustaǵan. Atap aıtsaq, múgedek balasy bar bilim bóliminiń qyzmetkerinen 2021 jyldan 2023 jylǵa deıin 400 myń teńgeden astam qarajat ustalǵan», - delingen oblystyq prokýratýra habarlamasynda.
Tekserý odan ózge 19 ata-ana men qamqorshyǵa qatysty osyndaı quqyq buzýshylyqtardy anyqtady.
Barlyq zańsyz ustalǵan aqsha qaıtarylyp, salyq bóliminiń basshysyna «sógis» jarııalandy.
Jetisýda sıntetıkalyq esirtki saýdalaǵan azamat 7 jylǵa sottalǵanyn jazǵan bolatynbyz.
