Jetisý oblysynda Mercedes kóligi aýdarylyp, bir adam qaza tapty
ASTANA. KAZINFORM — Jetisý oblysyndaǵy Taldyqorǵan — Úshtóbe avtojolynda bolǵan jol apatynan bir adam kóz jumyp, taǵy bir adam jaraqat aldy.
Jol-kólik oqıǵasy atalǵan avtojoldyń 21-shaqyrymynda bolǵan.
Aldyn ala málimet boıynsha, Mercedes-Benz avtokóliginiń júrgizýshisi rólge ıe bola almaı, kólik aýdarylyp ketken.
Apat saldarynan bir adam oqıǵa ornynda kóz jumdy. Al jaraqat alǵan ekinshi adam medıtsınalyq mekemege jetkizildi.
— Atalǵan jol-kólik oqıǵasy boıynsha polıtsııa qylmystyq is qozǵap, tergeý júrgizip jatyr. Qazir apattyń mán-jaıy men sebepteri anyqtalyp jatyr, — dep habarlady óńirlik polıtsııa departamenti.
Sondaı-aq quqyq qorǵaý organdary júrgizýshilerdi jyldamdyq rejımin saqtaýǵa, jol jáne aýa raıy jaǵdaıyn eskerýge ári kólik tizgininde barynsha muqııat bolýǵa shaqyrdy.
Aıta keteıik, buǵan deıin Túrkistanda jol apatynan eki adam qaza taýyp, taǵy biri aýrýhanaǵa jatqyzylǵan bolatyn.
Budan bólek, Kólik mınıstrligi jyl basynan beri respýblıkalyq mańyzy bar avtojoldarda tirkelgen jol-kólik oqıǵalarynyń statıstıkasyn jarııalap, apattardyń negizgi sebepterin ataǵan edi.
