Jetisý oblysynda memlekettik jer qoryn óz betinshe paıdalanýǵa jol berilmedi
TALDYQORǴAN. KAZINFORM – Jetisý oblysynyń Kerbulaq aýdanynda memlekettik menshikke jatatyn jer ýchaskesin zańsyz paıdalaný faktisi anyqtaldy. Bul týraly QR Aýyl sharýashylyǵy mınıstrliginiń baspasóz qyzmeti habarlady.
Atalǵan oblystyń QR AShM Jer resýrstary aımaqtyq komıtetiniń tarapynan júrgizilgen jospardan tys tekserý barysynda jer qoınaýyn paıdalanýshylardyń biri ózine tıesili jer ýchaskeniń sheginen tys aýmaqta áktas óndirý jumystaryn júrgizgeni belgili boldy. Naqtylap aıtqanda, óndiris jumystary tıisti ruqsatsyz memlekettik menshikke jatatyn jerlerde júrgizilgen.
Osyǵan oraı, QR Jer kodeksiniń 147-babyna sáıkes tekseris júrgizilip, buzýshylyq qujat júzinde rastaldy.
Tekserý nátıjeleri boıynsha QR Kásipkerlik kodeksine sáıkes zańdy tulǵaǵa anyqtalǵan buzýshylyqty joıý jóninde nusqama berildi.
Sonymen qatar QR Ákimshilik quqyqbuzýshylyq týraly kodeksine sáıkes kompanııa ákimshilik jaýapkershilikke tartylyp, 2,7 mln teńge kóleminde aıyppul salyndy. Aıyppul tolyq kólemde memleket kirisine óndirildi.
QR AShM Jer resýrstaryn basqarý komıteti jer zańnamasyn buzý faktilerin anyqtaý jáne jolyn kesý boıynsha júıeli jumystardy jalǵastyryp jatyr.