Jetisý oblysynda memlekettik satyp alý tártibin buzǵan shendiler jaýapqa tartyldy
TALDYQORǴAN. KAZINFORM – Jetisý oblysynda prokýrorlar Qaratal aýdany ákimdigi bólim basshylarynyń birin memlekettik satyp alý salasyndaǵy zańbuzýshylyqtar úshin ákimshilik jaýapkershilikke tartty.
Derekke qaraǵanda, aýdandyq TKSh bóliminiń basshysy sýmen jabdyqtaý jelilerin salýǵa jarııalanǵan konkýrs jeńimpazymen 100 mıllıon teńgeden astam somaǵa kelisimshart jasasýdan negizsiz bas tartqan.
- Sonymen qatar, ol qaıtadan satyp alý rásimin ótkizip, bul joly basqa qatysýshymen kelisimshart jasaǵan.
Taǵy bir jaǵdaıda merdiger tehnıkalyq talaptarǵa sáıkes kelmeıtin taýarlardy jetkizgen, alaıda osyǵan qaramastan aýdandyq TKSh bólimi ol taýarlardy qabyldap alǵan, - delingen baqylaýshy organnyń aqparatynda.
Prokýrorlyq qadaǵalaý aktisi boıynsha memlekettik qyzmet bedelin túsiretin jaǵdaılarǵa baılanysty konkýrs komıssııasynyń basqa da músheleri tártiptik jaýapkershilikke tartyldy, eki basshy men tórt mamanǵa qyzmetine tolyq saı emestigi týraly eskertý jasaldy.
Aıta keteıik, Qyzylorda prokýrorlary kásipkerlerdi zańsyz tekserýdiń 590-nan astam áreketiniń aldyn alǵan.