Jetisý oblysynda mas kúıinde kólik júrgizgen azamatqa ómir boıyna rýlge otyrýǵa tyıym salyndy

TALDYQORǴAN. KAZINFORM – Avtokólik – joǵary qaýip kózi, ony mas kúıinde basqarý júrgizýshiniń de, aınaladaǵy adamdardyń da ómiri men densaýlyǵyna aıtarlyqtaı qaýip tóndiredi. Osyǵan baılanysty Jetisý oblysy Aqsý aýdanynyń prokýratýrasy mas kúıinde kólik júrgizýdiń aldyn alý maqsatynda kórsetilim sot protsesin uıymdastyrdy.

Sotqa jergilikti júrgizýshiler, sonyń ishinde jeke tasymaldaýmen aınalysatyndar shaqyryldy.

Protsess barysynda buǵan deıin mas kúıinde kólik júrgizgeni úshin 15 táýlikke qamalyp, 7 jylǵa kólik júrgizý quqyǵynan aıyrylǵan azamatqa qatysty is qaraldy. Ol tıisti qorytyndy shyǵarmaı, júrgizýshi kýáliginsiz qaıtadan mas kúıinde rýlge otyryp, Qylmystyq kodekstiń 346-baby 1-bóliginde kózdelgen quqyq buzýshylyqty jasaǵan.

Sot sheshimimen ol 6 aıǵa bas bostandyǵynan aıyryldy jáne ómir boıyna kólik júrgizý quqyǵynan aıyryldy.

Júrgizýshilerge mas kúıinde kólik júrgizýge jol berilmeıtini qatań eskertiledi. Árkim joldaǵy qaýipsizdik úshin jeke jaýapkershiligin sezinýi qajet.

Aıta keteıik, Almaty joldarynda 400-den astam mas júrgizýshi ustaldy.