Jetisý oblysynda mal urlyǵyna qatysy bar úsh adam qamaýǵa alyndy

ASTANA. KAZINFORM — Jetisý oblysynda mal urlyǵy áshkerelendi, dep habarlaıdy Polisia.kz.

14 jeltoqsanda Jetisý oblysy Kerbulaq aýdanynyń polıtsııa bólimine Shubar aýylynyń turǵyny aryzben júgindi. Onyń málimetinshe 13 jeltoqsanǵa qaraǵan túni belgisiz tulǵalar eki buzaýyn urlap, saldarynan 600 myń teńge kóleminde materıaldyq shyǵyn keltirgen. Atalǵan derek boıynsha polıtsııa qyzmetkerleri jedel túrde sotqa deıingi tergep-tekserý jumystaryn bastady.

— Jedel-izdestirý jáne tergeý is-sharalarynyń nátıjesinde 41 jastaǵy jergilikti turǵyn kúdikti retinde anyqtalyp, ustaldy. Onyń turǵylyqty jerinde júrgizilgen tintý barysynda Toyota Land Cruiser avtokóliginen sýyq jáne atys qarýy, sondaı-aq ártúrli kalıbrdegi oq-dáriler tabylyp, tárkilendi. Tergeý barysynda eki buzaýdy kúdiktiden 200 myń teńgege satyp alǵanyn aıtqan kýáger de anyqtaldy. Urlanǵan mal zattaı dáleldeme retinde alynyp, zańdy ıesine qaıtaryldy, — delingen habarlamada.

Sonymen qatar qylmystyń aldyn ala sóz baılasý arqyly jasalǵany belgili boldy. Quqyqqa qaıshy áreketke 29 jáne 25 jastaǵy taǵy eki jergilikti turǵynnyń qatysy bar degen kúdik týyndady. Atalǵan tulǵalardyń osyǵan uqsas birneshe qylmysqa qatystylyǵy tekserilip jatyr. Atap aıtqanda 3 jeltoqsanda kúdiktiler Shubar aýylynyń taǵy bir turǵynynan úsh iri qara maldy urlap, 1 mln 200 myń teńge kóleminde shyǵyn keltirgen. Budan bólek 14 qarashada ózge bir aýyl turǵynynan quny 1 mln 500 myń teńgege baǵalanǵan úsh mal qoldy bolǵan. 

— Qazir barlyq kúdikti qamaýǵa alynyp, tergeý amaldary jalǵasyp jatyr. Polıtsııa olardyń aýdan aýmaǵynda jasalǵan ózge de qylmystarǵa qatystylyǵyn anyqtaıdy. Mal urlyǵymen kúres — ishki ister organdary qyzmetiniń basym baǵyttarynyń biri. Mundaı árbir quqyq buzýshylyqqa zań aıasynda qatań ári prıntsıpti baǵa beriledi, — dep atap ótti Jetisý oblystyq PD.

Budan buryn polıtsııa úsh kúnde 100-den astam mal urlyǵyn ashqanyn jazǵan edik.