Jetisý oblysynda mal baǵyp júrgen eki azamatqa naızaǵaı túsken

TALDYQORǴAN. KAZINFORM – 3 tamyzda Jetisý oblysy Eskeldi aýdanyna qarasty Aqynysaryn aýyldyq okrýginiń taýly aýmaǵynda mal baǵyp júrgen eki azamatqa naızaǵaı tústi. 

Oblystyq Tótenshe jaǵdaılar departamentiniń málimetinshe, 1970 jyly týǵan azamat oqıǵa ornynda kóz jumǵan. Al, 1975 jyly týǵan ekinshi adam jeńil jaraqat alyp, medıtsınalyq tekseristen keıin úıine jiberilgen.

Atalǵan derek boıynsha naızaǵaı soqqysynan er adamnyń qaza bolý faktisi boıynsha sotqa deıingi tergep-tekserý bastaldy.

– Oqıǵanyń barlyq mán-jaıyn anyqtaý maqsatynda qajetti sot saraptamalary taǵaıyndaldy, - dep habarlady Jetisý oblysynyń polıtsııa departamenti.

Vedomstvo naızaǵaı kezinde qaýipsizdik erejelerin saqtaýǵa shaqyrady. Ashyq alańda nemese taýly aýmaqtarda bolǵanda naızaǵaı kezinde dereý qaýipsiz orynǵa jasyryný qajettigi eskertildi.

Aıta keteıik, «Qazgıdromet» RMK sınoptıkteri 4 tamyzda qolaısyz aýa raıyna baılanysty elimizdiń 17 óńirinde daýyldy eskertý jarııalanǵanyn habarlaǵan bolatyn.