Jetisý oblysynda mádenıet, sport jáne bilim salasy qalaı ilgerilep jatyr
ASTANA. KAZINFORM – Búgin Ortalyq kommýnıkatsııalar qyzmetinde ótken baspasóz konferentsııasynda Jetisý oblysynyń ákimi Beıbit Isabaev jýrnalısterdiń suraqtaryna jaýap berdi.
Jýrnalıster aldymen aýyldyq jerdegi mádenı jáne sporttyq nysandardyń damýy týraly surady. Ákimniń aıtýynsha, sońǵy jyldary áleýmettik nysandardyń jańarý kórsetkishi 55–60 paıyzǵa jetken. Mádenıet salasynda sońǵy eki jarym jylda oblysta 39 jańa mádenıet nysany salyndy.
– Jalpy áleýmettik nysandardyń jańarý kórsetkishi 55–60 paıyzǵa jetti. Mádenıet salasyna keletin bolsaq, sońǵy eki jarym jylda Jetisý oblysynda 39 jańa mádenıet nysany salyndy. Buǵan deıin mádenıet úılerinde kólikter bolmaǵan. Beriletin kólikter shaǵyn, Qytaıda shyǵarylǵan 12 jáne 14 oryndyq avtobýstar, mádenıet úılerine óte qajet. Qarajat jergilikti bıýdjetten bólindi. Prezıdentke bergen ýádemiz oryndalyp jatyr. Áleýmettik nysandardyń ishinde mektep, densaýlyq saqtaý, sport jáne mádenı nysandar bar, jalpy 300-den astam nysan salyndy. Bul jumys ary qaraı jalǵasady. Úkimettiń qaýlysymen bıýdjettik tapshylyqqa baılanysty aldaǵy bir-eki jylda mádenıet nysandarynyń qurylysyn asa qajettilik bolmasa kidirtý usynylady. Bul – ýaqytsha shekteý, – deıdi ákim.
Jýrnalıster Jetisý oblysynyń sport salasyna qatysty suraq qoıdy, sonyń ishinde fýtbol komandasynyń qazirgi jaǵdaıy, Samat Smakov pen Mark Gýrmannyń jumysy jáne klýbty jekeshelendirýge berý jospary da talqylandy.
– Oblystaǵy iri kásiporyndarmen demeýshilik jóninde kelisimsharttarymyz bar. Bul bıýdjettik shyǵyndardy únemdeýge de kómektesedi, – dedi ákim.
Brıfıng barysynda Beıbit Isabaev Jetisý oblysyndaǵy kolledjderdiń jaı-kúıine toqtaldy.
Ákimniń aıtýynsha, Taldyqorǵanda jumysshy mamandyqtary boıynsha 27 kolledj jumys isteıdi. Sonyń ishinde kásiptik, polıtehnıkalyq, qurylys jáne basqa da jumysshy mamandyqtaryn daıarlaıtyn on kolledjde aýdıtorııalar men oqý qural-jabdyqtary tolyq jańartyldy.
– Bıyl osy on kolledjde jumysshy mamandardy daıarlaıtyn klastar men aýdıtorııalardyń qural-jabdyqtaryn jańarttyq. Sonymen qatar oblys kolledjderinde tórt jańa jumysshy mamandyǵy ashyldy. Olardyń ishinde tehnologtar, mal sharýashylyǵy zavodtarynyń tehnologtary, ken oryndaryn ıgeretin tehnologtar jáne dron operatorlary bar. Taldyqorǵan polıtehnıkalyq kolledjinde jasandy ıntellekt boıynsha Qytaıdyń iri kolledjimen birlesip jumys júrgizilip jatyr. Keler jyly osy baǵdarlama boıynsha jańa mamandyq ashylýy josparlanyp otyr, – dedi ákim.
Osylaısha, Jetisý oblysynda mádenıet, sport jáne bilim salasynda jańa nysandar men halyqaralyq yntymaqtastyq jobalarynyń júzege asýy aımaqtyń áleýmettik-ekonomıkalyq damýyna mańyzdy úles qosyp otyr.
Osylaısha, Jetisý oblysynda mádenıet, sport jáne bilim salasynda jańa nysandar men halyqaralyq yntymaqtastyq jobalarynyń júzege asýy aımaqtyń áleýmettik-ekonomıkalyq damýyna mańyzdy úles qosyp otyr.
Buǵan deıin Jetisý oblysynda sońǵy úsh jylda 188 aýyldyń ishindegi kósheler jóndeldi. Sonymen birge, óńirdegi respýblıkalyq mańyzy bar joldar tolyǵymen jańǵyrtylǵanyn jazǵanbyz.
Sonymen qatar Jetisý oblysynda jańadan Týrızm basqarmasy quryldy. Alakól jáne Balqash kólderiniń jaǵalaýyn kútip ustaý úshin eki kommýnaldyq mekeme qurylǵanyn jazǵanbyz.