Jetisý oblysynda Latvııa azamattary taýǵa saıahatqa shyǵyp, adasyp ketti

ASTANA. KAZINFORM - Aqtaý taýynda tótenshe oqıǵa boldy. Latvııadan kelgen eki týrıst kútpegen jerden joldan adasyp, toppen baılanysyn joǵaltyp alǵan. Saldarynan aýqymdy qutqarý operatsııasy oryndaldy, dep habarlaıdy Polisia.kz.

Saıttaǵy málimetterge qaraǵanda, Qazaqstanǵa týrıstik fırma arqyly kelgen týrıster Basshı aýylynan 44 shaqyrym jerde ornalasqan taý silemin tamashalaýǵa jolǵa shyqqan. Alaıda olar baǵyt-baǵdar men baılanysty joǵaltqan. Taýdaǵy aýa raıynyń buzylýy men qarańǵy túsýi jaǵdaıdy qıyndatty.

Joǵalǵandardy izdeýge Kerbulaq aýdandyq polıtsııasy, TJD, eriktiler men ormanshylar jumyldyryldy. Operatsııaǵa tikushaqtar men drondar tartylyp, taýly jerdi áýeden muqııat zertteýge múmkindik berdi.

Úmitin úzgen týrıster kútpegen jerden tikushaqtyń daýysyn estip, belgi bere bastady. Kóp uzamaı ýchaskelik polıtsııa ınspektorlary olardy anyqtaǵan. Qajetti kómek kórsetken qutqarýshylar týrısterdi qaýipsiz jerge shyǵaryp saldy.