Jetisý oblysynda kúıeýi áıelin óltirdi degen kúdikke ilindi
ALMATY. KAZINFORM – Jetisýlyq turǵyn áıelin uryp óltirdi. Qylmys 21 maýsym túni bolǵan. Bul týraly Kazinform agenttiginiń tilshisine marqumnyń týystary aıtty.
– Aqsý aýdanyna qarasty Balasaz aýylynda turatyn sińlim Aızat Maratqyzy 21 maýsymnan 22 maýsymǵa qaraǵan túni kúıeýiniń soqqysynan kóz jumdy. Kúıeýbala ony kórshisiniń kóligimen Sýyqsaı aýylyndaǵy ata-anasynyń úıine aparǵan. Keıin Jansúgir kentindegi aýdandyq aýrýhanaǵa jetkizgen. Alaıda onda jóndeý jumystary júrip jatqandyqtan, Taldyqorǵandaǵy kópsalaly aýrýhanaǵa alyp barǵan, – deıdi ápkesi Raýshan Dárimbekova.
Onyń aıtýynsha, qoldarynda dáriger qorytyndysy bar.
– Qorytyndyǵa sáıkes, emdeý mekemesine jetkizilgen kezde pýlsi soqpaǵan, qan qysymy bolmaǵan – bári nól. Soǵan qaramastan «komada jetkizildi» dep jazyp qoıǵan. Aýrýhana eshqandaı naqty aqparat bermeı otyr. Erteńinde enesi kelip, qaraly habardy jetkizdi. Aızattyń «joǵarǵy qabattan qulap ketkenin» aıtty. Biraq biz buǵan senbeımiz, – deıdi ol.
Osy jaǵdaıǵa qatysty Jetisý oblystyq densaýlyq saqtaý basqarmasyna da saýal joldadyq.
– Qaıtys bolǵan adamǵa qatysty aqparatty tek polıtsııa men sot-medıtsınalyq saraptamadan ǵana alasyzdar. Tergeý júrip jatyr. Sondyqtan, densaýlyq saqtaý basqarmasy eshqandaı aqparat bere almaıdy. Oǵan quqyǵymyz joq, – dep jaýap berdi basqarmanyń baspasóz qyzmetinen.
Al, marqumnyń týystary máıitti sot-medıtsınalyq saraptamasyz alǵandaryn aıtady.
– Máıithanadan eshqandaı qujatsyz aldyq. Sińlimniń denesinde saý jer qalmaǵan. Ústi-basy kógala qoıdaı kógerip ketken. Ashyq jaraqattar da bar. Bul – turmystyq zorlyq-zombylyqtyń aıqyn kórinisi. Ol kúıeýiniń qolynan qaza tapty. Tergeý ádil ótip, kináli adam laıyqty jazasyn alsa eken. Artynda qan jutyp qalǵan ata-anasy men eki jasqa da tolmaǵan kishkentaı qyzy qaldy, – deıdi ol.
Jetisý oblystyq Polıtsııa departamenti qazir qylmystyq is qozǵalyp, tergeý amaldary júrip jatqanyn málimdedi.
– Atalǵan fakti boıynsha polıtsııa qylmystyq is qozǵady. Kúdikti ustalyp, ýaqytsha ustaý ızolıatoryna qamaýǵa alyndy. Qazir oqıǵanyń barlyq mán-jaıy anyqtalyp, tergeý júrgizilip jatyr. Tergeý múddesine baılanysty basqa aqparat jarııalaýǵa jatpaıdy,– delingen vedomstvo jaýabynda.
Osyǵan deıin Almatyda zańger áıeldi pyshaqtap óltirgen burynǵy kúıeýi 11 jylǵa sottalǵany týraly jazǵanbyz.