Jetisý oblysynda qutqarýshylar qar qursaýynda qalǵan 17 adamdy evakýatsııalady

ASTANA. KAZINFORM — Alakól aýdany Kóktuma stantsııasynan 35 shaqyrym qashyqtyqta úsh jeńil avtokólik qar qursaýynda qalyp qoıdy. Olardyń ishinde 14 adam bolǵan.

Oqıǵa ornyna TJM qyzmetkerleri dereý jetti. Qutqarýshylar barlyq jolaýshylardy evakýatsııalap, olardyń qaýipsizdigin qamtamasyz etti.

Sondaı-aq Sarqan aýdany, Lepsi aýylynan 15 shaqyrym qashyqtyqta, Balqash kóliniń jaǵalaýynda tehnıkalyq aqaýy bar avtokólik jolda qalǵan. Qutqarýshylar munda 3 adamdy evakýatsııalady. Olarǵa medıtsınalyq kómek qajet bolǵan joq.

— Tótenshe jaǵdaılar mınıstrligi júrgizýshilerge aýa raıyn eskere otyryp, qarly jáne shalǵaı joldarda qozǵalys kezinde saqtyq sharalaryn saqtaýdy eskertedi, — delingen aqparatta.

Buǵan deıin Jambyl oblysynda qutqarýshylar qar qursaýynda qalǵan 15 kólikti shyǵarǵany týraly jazdyq.