Erkin kúresten Qazaqstan jastar jáne jasóspirimder quramalarynyń aǵa bapkerleri taǵaıyndaldy
ASTANA. KAZINFORM – Elimizdiń erkin kúresten 23 jasqa deıingi jastar jáne 17 jasqa deıingi jasóspirimder quramalarynyń aǵa bapkerleri taǵaıyndaldy. Bul jóninde Qazaqstan kúres federatsııasynyń baspasóz qyzmeti málim etti.
Erkebulan Keshýbaev erkin kúresten elimizdiń 23 jasqa deıingi jastar quramasynyń tizginin ustady.
Erkebulan Nurlanuly – Qazaqstan Respýblıkasynyń eńbek sińirgen jattyqtyrýshysy, sport sheberi, osy salada 20 jyldan astam tájirıbesi bar bilikti maman. Ol ár jyldary Almaty qalasynyń, sondaı-aq Qazaqstan Respýblıkasynyń jasóspirimder men jastar quramalarynyń aǵa jattyqtyrýshysy qyzmetterin atqardy.
Bapkerdiń jetekshiligimen álem, Azııa chempıonattary men halyqaralyq týrnırlerdiń jeńimpazdary men júldegerleri tárbıelendi. Onyń shákirtteri arasynda álem chempıondary, Azııa chempıondary jáne Qazaqstannyń birneshe dúrkin chempıony bar.
Sondaı-aq Jasulan Muhtarbekuly 17 jasqa deıingi Qazaqstan jasóspirimder quramasynyń aǵa bapkeri qyzmetine keldi.
Erkin kúresten halyqaralyq dárejedegi sport sheberi Jasulan Muhtarbekuly uzaq jyldar el namysyn abyroımen qorǵap, 2003 jyly Álem chempıonatynyń kúmis júldegeri bolǵan. Kóptegen iri halyqaralyq básekeniń júldegeri boldy.
Bapkerlik mansabyn ol 2014 jyly áıelder kúresiniń aǵa jattyqtyrýshysy retinde bastady. Sodan beri elimizdiń ártúrli sport mektepterinde bapkerlik qyzmetter atqaryp, shákirtter tárbıeledi.
Eske salsaq, budan buryn Dáýlet Nııazbekov erkin kúresten 20 jasqa deıingi Qazaqstan jastar quramasynyń tizginin ustady.