Jetisý oblysynda qutqarýshylar 13 adamdy qar qursaýynan shyǵardy

TALDYQORǴAN. KAZINFORM — Aqsý aýdanynda jolda qalǵan jolaýshylarǵa qutqarýshylar kómek berdi. Bul týraly TJM málimdedi.

Búgin Jetisý oblysyna qarasty Aqsý aýdanynda, Kóshkental aýylynyń mańynda tórt jeńil avtokólik qar qursaýynda qalyp qoıǵan. Tótenshe jaǵdaılar qyzmetkerleri qıyn jaǵdaıǵa tap bolǵan jolaýshylardy qaýipsiz jerge jetkizdi.

— Qutqarýshylar dereý oqıǵa ornyna shyǵyp, qar qursaýynan barlyǵy 13 adam, onyń ishinde 1 balany qutqaryp, Qapal aýylyna jetkizdi. Medıtsınalyq kómek qajet bolmady, — delingen habarlamada.

TJM qyzmetkerleri saparǵa shyǵar aldynda kóliktiń tehnıkalyq jaǵdaıyn tekserip, aýa raıy jaǵdaıyn qadaǵalaýdy eskertedi. Eske salaıyq osyǵan deıin Taldyqorǵan-Qyzylaǵash joly jabylǵanyn jáne Aqsý aýdanynda kólik qozǵalysyna shekteý qoıylǵanyn jazǵanbyz.