Jetisý oblysynda Qurban aıtqa arnalǵan 17 arnaıy oryn belgilendi
ASTANA. KAZINFORM – Jetisý oblysynda Qurban aıt merekesi qarsańynda qurbandyq shalýǵa arnalǵan 17 arnaıy alań anyqtaldy.
Arnaıy oryndar 27-29 mamyr aralyǵynda oblystyń barlyq aýdan-qalalarynda jumys isteıdi.
Mal soıý jáne satý oryndary sanıtarlyq-epıdemıologııalyq, veterınarlyq jáne dinı talaptarǵa saı uıymdastyrylǵan.
Eń kóp alań Sarqan jáne Aqsý aýdandarynda daıyndalǵan, árqaısynda tórt orynnan bar. Panfılov aýdanynda eki núkte jumys istese, qalǵan aýdan-qalalarda bir-birden alań belgilengen.
Taldyqorǵan qalasyndaǵy «Iman» ortalyq meshitiniń naıb-ımamy Tabarak Hamıttiń aıtýynsha, Qurban aıttyń rýhanı máni tek qurban shalýmen shektelmeıdi.
– Qurban aıt – meıirim, qaıyrymdylyq pen janashyrlyq merekesi. Onyń negizgi maqsaty – az qamtylǵan otbasylarǵa qoldaý kórsetý, qıyn jaǵdaıǵa tap bolǵan adamdarǵa kómektesý, qoǵamdaǵy birlik pen ózara qurmetti nyǵaıtý, – dedi ol.
Imamnyń sózinshe, qurban shalý ár musylmanǵa mindetti emes.
– Qurban shalý shamamen 85 gramm altynnyń nemese 595 gramm kúmistiń qunyna teń dáýleti bar adamdarǵa paryz etiledi. Eger adamnyń mundaı múmkindigi bolmasa, bul kúná sanalmaıdy. Islam adamǵa shamadan tys mindet júktemeıdi, – dep túsindirdi Tabarak Hamıt.
Qurbandyqqa qoı, eshki, sıyr jáne túıe shalýǵa bolady. Sonymen qatar maldyń deni saý, kútimi jaqsy ári qońdy bolýy tıis.
– Aýrý nemese kemistigi bar mal qurbandyqqa jaramaıdy. Múmkindiginshe jaqsy mal tańdaý usynylady. Sebebi qurbandyq – shúkirshilik pen yqylastyń belgisi, – dedi naıb-ımam.
Sondaı-aq búginde onlaın-qurbandyq qyzmeti de qoljetimdi bolyp otyr. Dinı platformalar arqyly qurban shalýǵa ótinim berýge bolady.
– Barlyq adam arnaıy orynǵa kele almaıdy. Sondyqtan onlaın-qurbandyq – yńǵaıly ári sharıǵatqa saı múmkindik. Eń bastysy, rásimniń ashyq ári adal ótýi, – dedi spıker.
Mereke kúnderi arnaıy alańdarda veterınarlyq baqylaý uıymdastyrylyp, sanıtarlyq qaýipsizdik pen qoǵamdyq tártip qamtamasyz etiledi.
Taldyqorǵanda resmı qurbandyq shalý alańy 3-bólimshe, Q. Jalaıyrı dańǵyly, 2B mekenjaıynda ornalasady.
Aıta keteıik, buǵan deıin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly kásipkerlerdi Qurban aıt qarsańynda mal baǵasyn kótermeýge shaqyrǵan bolatyn.
