Jetisý oblysynda quny 237 mln teńgeden asatyn jer memleketke qaıtaryldy
ASTANA. KAZINFORM – Jetisý oblysynyń prokýratýrasy paıdalanylmaı jatqan jáne zań talaptaryn buza otyryp berilgen jer ýchaskelerin memleket menshigine qaıtarý boıynsha júıeli jumystar júrgizip jatqanyn habarlady.
Bul sharalar azamattardyń quqyqtary men múddesin qorǵaýǵa, sondaı-aq jer qatynastary salasyndaǵy zańdylyqty qamtamasyz etýge baǵyttalǵan.
Alakól aýdany prokýratýrasy júrgizgen taldaý barysynda aýyl sharýashylyǵy maqsatyndaǵy jerlerdiń uzaq ýaqyt boıy ıgerilmegeni jáne olardyń nysanaly maqsatyna saı paıdalanylmaǵany anyqtaldy. Jekelegen jer paıdalanýshylardyń áreketteri saldarynan qundy jer alqaptary jyldar boıy qoǵam men aýyl sharýashylyǵy salasyna paıdasyn tıgizbegen.
Prokýrorlyq qadaǵalaý aktilerin engizý jáne qabyldanǵan sharalar nátıjesinde jalpy aýdany 1,3 myń gektar jer ýchaskeleri memleket menshigine qaıtaryldy. Qaıtarylǵan jerlerdiń kadastrlyq quny 237 mln teńgeden asady.
Jerdi memleket menshigine qaıtarý jer qatynastary salasyndaǵy zańdylyqty qalpyna keltirýge jáne óńirdiń aýyl sharýashylyǵy resýrstaryn neǵurlym tıimdi paıdalanýdy qamtamasyz etýge múmkindik berdi.
Aıta keteıik, Aqmolada 1,8 mlrd teńge turatyn orman qory memleketke qaıtaryldy.
Qyzylordada quny 86 mln teńge jer ýchaskesi memleket menshigine qaıtaryldy.
