Jetisý oblysynda qum-qıyrshyqtas qospasyn zańsyz óndirgender aıyppul arqalady

ASTANA. KAZINFORM – Jetisý oblysynyń Alakól aýdanynda memlekettik menshikke tıesili jer ýchaskesin óz betinshe paıdalaný faktisi anyqtaldy. Bir zańdy tulǵa osy aýmaqta tıisti quqyq belgileıtin qujattarsyz qum-qıyrshyqtas qospasyn óndirýmen aınalysqan.

Atalǵan quqyqbuzýshylyq Jetisý oblysy boıynsha Jer resýrstaryn basqarý departamenti tarapynan júrgizilgen jospardan tys tekseris barysynda belgili boldy.

- Tekseris nátıjesine qaraǵanda, jer ýchaskesi QR Jer kodeksiniń talaptaryn buza otyryp paıdalanylǵan. Quqyqbuzýshyǵa qatysty ákimshilik is qozǵalyp, onyń nátıjesinde 2,7 mln teńge kóleminde aıyppul salyndy, - dep jazdy AShM baspasóz qyzmetinen.

Qazirgi ýaqytta quqyqbuzýshylyq joıylyp, jer ýchaskesin óz betinshe paıdalaný toqtatyldy.

Jetisý oblysy boıynsha Jer resýrstaryn basqarý departamenti jer zańnamasynyń saqtalýyn baqylaý jáne osyndaı faktilerdiń aldyn alý baǵytynda júıeli jumysyn jalǵastyrýda.

Aıta keteıik, Abaı oblysynda prokýratýra jer qoınaýyn paıdalanýshylardan 100 mln teńge óndirip aldy.