Jetisý oblysynda kólik urlap, izin sýytqan 33 jastaǵy er adam ustaldy

TALDYQORǴAN. KAZINFORM – Taldyqorǵan qalasynan jeńil kólikti urlaǵan 33 jastaǵy azamat Almaty oblysy, Besaǵash aýylynda tutqyndalyp, qamaýǵa alyndy. Tergep-tekserý jumystary jalǵasyp jatyr. 

Jetisý oblystyq polıtsııa departamentiniń málimetinshe, kúdikti Mercedes markaly avtokólikti urlap, Besaǵash aýylyna jasyrynyp úlgergen. Polıtsııa qyzmetkerleri qylmys jasaǵan azamattyń meken jaıyn anyqtap, jedel is-qımyldyń nátıjesinde ony tutqyndaǵan. Qazir kólik zańdy ıesine qaıtarylyp, kúdikti qamaýǵa alyndy.

– Qazirgi ýaqytta tergeý jalǵasyp jatyr. Zańnamaǵa sáıkes avtokólikti urlaǵany úshin qylmystyq jaýapkershilik qarastyrylǵan. Kináli adamǵa myń aılyq eseptik kórsetkishke deıin aıyppul, 600 saǵatqa deıin túzeý nemese qoǵamdyq jumystar, 2 jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy taǵaıyndalýy múmkin, - delingen oblystyq polıtsııa departamentiniń baspasóz qyzmeti usynǵan málimette.

Aıta keteıik polıtsııa qyzmetkerleri azamattarǵa muqııat bolýdy jáne óz múlkin qorǵaý úshin barlyq saqtyq sharasyn jasaýdy eskertedi.

Eske salaıyq osyǵan deıin Jetisý oblysynda 72,5 mln teńgeniń gaz qubyryn urlaǵan kúdiktilerdiń ustalǵanyn jazǵanbyz.