Jetisý oblysynda qyzylsha juqtyrǵandardyń 85 paıyzy ekpe almaǵan

Jetisý oblysynda 282 naýqastan qyzylsha aýrýynyń belgileri anyqtaldy. Juqpaly dertke shaldyqqandardyń 85 paıyzy ekpe saldyrmaǵan, dep habarlaıdy Kazinform.

Oblys epıdemıologtaryn qyzylshaǵa qarsy vaktsına almaǵan adamdardyń jyl saıyn kóbeıip otyrǵany alańdatady. Máselen, 2020 jyly 285 turǵyn aýrýǵa qarsy ekpe saldyrýdan bas tartsa, bıylǵy 10 aıda bul kórsetkish 496 adamǵa jetken.

Al qazir dárigerlerdiń kómegine júgingen 282 naýqastyń arasynda vaktsınadan bas tartqan 239 adam bar eken. Sondaı-aq juqpaly dertpen aýyrǵan naýqastardyń kóbi 4 jasqa deıingi balalar bolyp otyr.

«Qandaı da bolsyn ekpeden bas tartýdyń sońy juqpaly aýrý taraǵan kezde qıynǵa soǵady. Qazirgi qyzylsha epıdemııasynyń órshýi osyny kórsetip otyr. Vaktsınatsııa jasaýdan jeke ustanymy men dinı senimine baılanysty úzildi-kesildi bas tartatyndar bar. Oǵan ınternet resýrstary men áleýmettik jelilerde taraǵan negizsiz alynǵan aqparatqa senip, balalaryna ekpe saldyrmaıtyndar qosyldy. Osylaısha, aımaqtaǵy epıdemııalyq jaǵdaıdyń asqynýyna ózimiz jol berip otyrmyz», – deıdi Jetisý oblysynyń shtattan tys epıdemıology Randır Saharıev.