Jetisý oblysynda qazaq kınosynyń onkúndigi bastaý aldy

ASTANA. KAZINFORM — 2025 jyldyń 17 maýsymynda Taldyqorǵan qalasynda Ulttyq kınony qoldaý memlekettik ortalyǵynyń uıymdastyrýymen «Qazaq kınosynyń onkúndigi» mádenı jobasy bastaldy, dep habarlaıdy Mádenıet jáne aqparat mınıstrliginiń baspasóz qyzmeti.

Іs-sharanyń ashylý saltanaty І. Jansúgirov atyndaǵy Mádenıet saraıynda ótti. Joba aıasynda halqymyzdyń dańqty uly Qajymuqan Muńaıtpasovtyń ómir joly men jarqyn jetistikteri kórkem beınelengen «Qajymuqan» fılmi usynyldy. Fılm QR Mádenıet jáne aqparat mınıstrligi men Ulttyq kınony qoldaý ortalyǵynyń qoldaýymen túsirilgen.

Kıno kúnderi aıasynda ártúrli janrdaǵy fılmder kórsetiledi. Kórnekti tulǵalardyń júrip ótken jolyn beıneleıtin «Jambyl. Jańa dáýir», «Dos-Muqasan» fılmderi, otanǵa degen súıispenshilikti pen áskerı qyzmetkerlerdiń ómirin baıandaıtyn «Nabat operatsııasy», «Patrıottar ýaqyty» týyndylary kórermenge jol tartady. Sonymen qatar dástúr men ult bolmysyn ashyp kórsetetin «Baýyryna salý» fılmi de kórsetiledi.

Jobanyń maqsaty – otandyq týyndylardy keńinen tanystyryp, aýyl-aımaq turǵyndaryna ulttyq kınonyń jańarǵan kelbetin kórsetý. Buǵan deıin mundaı kórsetilimder Qaraǵandy, Jambyl, Soltústik jáne Batys Qazaqstan oblystarynda ótken bolatyn.

Buǵan deıin Ulttyq fılm mártebesine úmitker 33 joba saraptamalyq keńesten oń baǵa alǵanyn jazdyq.