Jetisý oblysynda qaza bolǵan qutqarýshynyń otbasyna tıisti kómek berilip jatyr - TJM
ASTANA. KAZINFORM – QR Tótenshe jaǵdaılar vıtse-mınıstri Kegen Tursynbaev Jetisý oblysynda qutqarý operatsııasy kezinde qaza bolǵan qyzmetkerdiń otbasyna tıisti kómek berilip jatqanyn aıtty.
- Bizdiń qutqarýshy Jetisý oblysynyń turǵynyn qutqarý kezinde qaza tapty. Qazir kóktemde muzdyń erýine qaramastan, ol (balyqshy) tyńdamaı barǵan. Osynyń saldarynan bizdiń qutqarýshy óziniń mindetin atqarý barysynda sýǵa ketti, - dedi K.Tursynbaev Senatta tilshiler suraǵyna jaýap bere otyryp.
Onyń aıtýynsha, vedomstvo jaǵynan qutqarýshynyń otbasyna tıisti kómek berilip jatyr.
Eske salsaq, jaqynda Jetisý oblysynyń Panfılov aýdanynda Altynkól kólinde júrgizilgen qutqarý operatsııasy kezinde óńirlik tótenshe jaǵdaılar departamentiniń qyzmetkeri Damır Taranov qaza tapty.
TJD habarlaǵandaı, 2026 jyldyń 7 naýryzynda qyzmet pýltine Atameken aýyldyq okrýgindegi Altynkól kólinde balyq aýlaý kezinde muz jarylǵany týraly habar túsken. Nátıjesinde bir er adam synyp, bólingen muzda qalyp, sý qoımasynyń ortasyna aǵyp ketken. Qutqarý operatsııasy kezinde muz taǵy da jarylyp, qaıǵyly jaǵdaı bolǵan.
