Jetisý oblysynda qaıtarylǵan aktıvter esebinen salynǵan segiz jańa medıtsınalyq nysan ashyldy
ASTANA. KAZINFORM — Jetisý oblysynda alǵashqy medıtsınalyq-sanıtarııalyq kómek júıesin nyǵaıtýǵa baǵyttalǵan birqatar shara qabyldandy. Óńir aýdandarynda segiz medıtsınalyq nysan ashyldy.
Óńirde barlyǵy 18 joba júzege asyrylyp jatyr. Úkimet Arnaýly memlekettik qordan 1,7 mlrd teńge bóldi.
Jańa densaýlyq saqtaý nysandary paıdalanýǵa berilgen aýyldar:
Jalǵyzaǵash jáne Qaınar (Eskeldi aýdany)
Sarytóbe (Panfılov aýdany)
Jańalyq (Aqsý aýdany)
Qaratal (Kóksý aýdany)
Oıan (Qaratal aýdany)
Sonymen qatar Alakól aýdany Jaıpaq aýylynda dárigerlik ambýlatorııa men Qaınar aýylynda FAP iske qosyldy.
Nysandardyń barlyǵy ınjenerlik ınfraqurylymmen, zamanaýı medıtsınalyq tehnıkamen jabdyqtalǵan jáne alǵashqy medıtsınalyq-sanıtarııalyq kómek kórsetý standarttaryna sáıkes keledi.
Bul jobalardy júzege asyrý shalǵaıdaǵy eldi mekenderdiń 4 myńnan astam turǵynyn medıtsınalyq kómekke qoljetimdilikpen qamtamasyz etýge, sondaı-aq jańa jumys oryndaryn ashýǵa jáne óńirdiń densaýlyq saqtaý júıesiniń materıaldyq-tehnıkalyq bazasyn nyǵaıtýǵa múmkindik beredi.
Buǵan deıin Qaraǵandy oblysynda qaıtarylǵan aktıvter esebinen 51 medıtsınalyq nysan salynǵan bolatyn.