Jetisý oblysynda Qaratal ózeniniń arnasyn zańsyz ózgertý áreketi toqtatyldy
ASTANA. KAZINFORM – Jetisý oblysynda Qaratal ózeniniń tabıǵı arnasyn ruqsatsyz ózgertý faktisi anyqtalyp, zańsyz jumystar toqtatyldy, dep habarlady Sý resýrstary jáne ırrıgatsııa mınıstrligi.
Mınıstrlik málimetinshe, basseındik sý ınspektsııalary sý qorǵaý aımaqtary men beldeýlerinde karerlerdi zańsyz qazý jáne paıdaly qazbalardy ruqsatsyz óndirý faktilerin anyqtaý maqsatynda turaqty monıtorıng júrgizip keledi.
Osyndaı tekserýlerdiń birinde Balqash-Alakól basseındik sý ınspektsııasy Jetisý oblysynyń tabıǵat qorǵaý prokýratýrasymen birlesip, Qaratal ózeniniń arnasyn zańsyz ózgertý áreketin anyqtaǵan.
Tekserý barysynda ýákiletti memlekettik organnyń tıisti kelisiminsiz sý nysanynyń tabıǵı arnasyn ózgertýge ákep soqqan jumystar júrgizilgeni belgili boldy.
Atalǵan quqyq buzýshylyqqa baılanysty kináli tulǵalarǵa ákimshilik yqpal etý sharalary qoldanyldy.
– Ózen arnasyn zańsyz ózgertý sý nysanynyń tabıǵı gıdrologııalyq rejıminiń buzylýyna, jaǵalaýlardyń shaıylýyna jáne oǵan irgeles aýmaqtardy sý basý qaýpine ákelýi múmkin. Mundaı jumystar Qazaqstan Respýblıkasynyń sý zańnamasynyń talaptaryna qatań sáıkes júrgizilýi kerek, – dedi Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıteti tóraǵasynyń mindetin atqarýshy Temirlan Ábdiqulov.
Aıta keteıik, buǵan deıin elimizde ózen arnalary men jaǵalaýlarynan qum, qıyrshyqtas jáne basqa da tabıǵı materıaldardy zańsyz óndirý sý ekojúıelerine keri áser etetini habarlanǵan edi. Sý resýrstary jáne ırrıgatsııa mınıstrliginiń málimetinshe, 2025 jyly jáne 2026 jyldyń alǵashqy toǵyz aıynda sý qorǵaý aımaqtarynda jer qoınaýyn zańsyz paıdalanýǵa baılanysty 8 mln teńgeden astam aıyppul salynǵan.