Jetisý oblysynda qańǵybas ıt qapqan 800 adam dáriger kómegine júgingen
TALDYQORǴAN. KAZINFORM – Jetisý oblysynda qańǵybas ıtterdiń kóbeıýi ózekti máselege aınaldy. Muny áleýmettik jeliler arqyly taraǵan azamattardyń aryz-shaǵymdarynan baıqaýǵa bolady. Jyl basynan beri qabaǵan ıt qapqan onǵa jýyq adam medıtsınalyq járdem alyp úlgergen Al byltyr qaraýsyz ıtterdiń shabýylyna 800 adam ushyrapty.
– 2023 jyly densaýlyq saqtaý mekemelerine janýarlardyń adam shabýylyna baılanysty 819 jaǵdaıy týraly shuǵyl habarlama kelip tústi. Aýyldyq okrýgterdiń mal dárigerleri 502 úı janýarlaryn klınıkalyq baqylaýǵa alyp, qorytyndysy boıynsha ıelerine 474 anyqtama berdi. Qalǵan 317 janýardyń ıeleri anyqtalǵan joq - deıdi Jetisý oblysy veterınarııa basqarmasynyń bólim basshysy Darhan Ábilbaev .
Sondaı-aq «Janýarlarǵa jaýapkershilikpen qaraý týraly» zańdy júzege asyrý maqsatynda ótken jyly Іshki ister basqarmasynyń qyzmetkerleri 31 adamǵa eskertý jasapty. Al 136 azamat 739 815 myń teńge kóleminde aıyppul tólegen.
Jalpy ótken jyly Jetisý óńirinde barlyǵy 12 933 qańǵybas ıt pen 134 mysyq aýlanǵan. Onyń ishinde 850-ge jýyq úı janýarlary ıesine qaıtarylyp, qorǵaý uıymdaryna berildi. 1500-ge jýyq ıt pen mysyq kastratsııalansa, 606-sy zalalsyzdandyrylyp, mıkrochıpteldi. Al 10 myńnan astamy izgilik jolmen joıylǵan.
– 2021 jylǵy 30 jeltoqsanda № 97 «Janýarlarǵa jaýapkershilikpen qaraý týraly» Zańy kúshine endi. Osy zań aıasynda 2023 jyly tórt mańyzdy bıýdjettik baǵdarlamany júzege asyrýǵa oblystyq bıýdjetten qomaqty qarjy – 170 mıllıon teńge bólindi. Olar «Qańǵybas ıtter men mysyqtardy aýlaýdy jáne jansyzdandyrý», «Qańǵybas jáne qańǵybas janýarlardy ýaqytsha ornalastyrý jumystaryn júrgizý», «Qaraýsyz jáne qańǵybas janýalardy sáıkesendirý», «Qańǵybas janýarlardy egý jáne zalalsyzdandyrý» baǵdarlamalaryna bıyl da qarjylaı qoldaý kórsetilip oblystyq bıýdjetten qosymsha 172,4 mıllıon teńge bólindi, - deıdi Jetisý oblysy veterınarııa basqarmasynyń bólim basshysy Darhan Ábilbaev .
