Jetisý oblysynda 9 kanal rekonstrýktsııalanyp jatyr
ASTANA. KAZINFORM — Jetisý oblysynda 25 myń gektar egistik alqapty sýmen qamtamasyz etý úshin kanaldardy rekonstrýktsııalaý jumystary júrgizilip jatyr. Bul týraly Sý resýrstary jáne ırrıgatsııa mınıstrligi málim etti.
Jetisý oblysyna jumys sapary kezinde Sý resýrstary jáne ırrıgatsııa mınıstri Nurjan Nurjigitov óńirdiń sý sharýashylyǵy nysandarynyń jaı-kúıimen jáne olardyń jumysymen, sondaı-aq birqatar iri jobanyń iske asý barysymen tanysty.
Kóksý aýdanynda vedomstvo basshysy Islam damý bankiniń qoldaýymen júzege asyrylyp jatqan ırrıgatsııalyq jáne drenajdyq júıelerdi rekonstrýktsııalaý jobasyn tekserdi. Onyń birinshi kezeńinde jalpy uzyndyǵy 108,7 shaqyrym bolatyn 9 kanal jóndelip jatyr. Bul jumystar kelesi jyly aıaqtalady dep josparlanǵan.
Jobanyń ekinshi kezeńinde taǵy 157,8 shaqyrym kanal rekonstrýktsııalanady. Barlyq jumys aıaqtalǵan soń Kóksý aýdanyndaǵy sýarmaly jer kólemi 13,6 myń gektarǵa ulǵaıady. Aqsý aýdanynda kanaldardy betondaý jumystary jalǵasyp jatyr. Búginde jobanyń 75 paıyzy oryndalǵan. Tolyq aıaqtaý kelesi jylǵa josparlanǵan. Kanaldardy betondaý nátıjesinde 11 myń gektar jerge turaqty sý jetkiziledi. Nurjan Nurjigitov jumystardy belgilengen merzimde aıaqtaýdy tapsyrdy.
– Jetisý oblysynda iske asyrylyp jatqan jobalar óńirdiń aýyl sharýashylyǵy áleýetin arttyrýǵa, ıaǵnı sýarmaly jerlerdiń kólemin kóbeıtýge baǵyttalǵan. Barlyq jumys kestege saı júrip jatyr jáne ýaqytynda aıaqtalýy kerek. Bizdiń mınıstrlik aýqymdy jobalardy júzege asyrý úshin ınvestıtsııalar men granttyq qarajatty belsendi tartyp otyr. Endi osy bastamalardy sońyna deıin jetkizý qajet. Agrarlyq sektordy sapaly ári ýaqytyly sýmen qamtamasyz etý – bizdiń basty mindetterimizdiń biri, – dedi Sý resýrstary jáne ırrıgatsııa mınıstri Nurjan Nurjigitov. Bıyl qyrkúıek aıynda
Aqsý aýdanynda kúrdeli rekonstrýktsııadan keıin Qyzylaǵash sý qoımasy paıdalanýǵa berildi. Buǵan deıin nysanda bóget pen magıstraldyq kanal jóndelip, sý alý jáne sý jiberý júıeleri jóndelip, avtomattandyrylǵan jáne eskertý júıesi ornatylǵan.
Sońǵy úsh jylda Qyzylaǵash sý qoımasy synaq rejımde jumys istep, birtindep sý jınady. Qazirgi ýaqytta Sý resýrstary jáne ırrıgatsııa mınıstrliginiń Sý sharýashylyǵy komıteti Qyzylaǵash massıvin salý jobasyn júzege asyryp jatyr. Bul joba Aqsý aýdanyndaǵy sýarmaly jer kólemin 4 500 gektarǵa arttyrýǵa múmkindik beredi.
Eske sala keteıik, buǵan deıin Bartoǵaı sý qoımasynyń bógeti seısmoturaqtylyq turǵysynan rekonstrýktsııalanatynyn jazǵan edik.