Jetisý oblysynda ıtter mal men úı qustaryna shaýyp jatyr
TALDYQORǴAN.KAZINFORM- Kóksý aýdanynda ıtter qoraǵa túsip, usaq maldardyń qarnyn jaryp, úı qustaryn qyryp tastaǵan. Aýyl turǵyndary shaǵym aıtty.
Jetisý oblysyndaǵy Kóksý beketinde ıtter qoradaǵy maldarǵa shaýyp, qaryndaryn aqtaryp ketken. Aýyl turǵyndarynyń aıtýynsha bul birinshi jaǵdaı emes. Jylda qoı-eshkilerin óltirip, qaz-úırekterin tamaqtap ketedi eken.
- Qaz ben úırek baǵyp otyrǵanyma 1 jylǵa jýyqtap qaldy. Aýdan ortalyǵyndaǵy bazarǵa aparyp satyp, kúneltemin. 1 qazdyń quny 12-15 myń teńge. 2 aqpan kúni qustardy qoradan shyǵaryp, baqshaǵa jibergenmin. Birazdan soń ý-shý boldy da ketti. Júgirip shyqsam aýladaǵy qustarymdy 3 ıt túgel qyryp tastaǵan. Baıqaǵanym ishinde nemis ovcharkasy men haskı tuqymdy ıt bar, - dedi aýyl turǵyny Irına Pak.
Bir kúnde qaz-úıregi qyrylyp qorasy qańyrap qalǵan turǵyn óteýin kimnen suraryn bilmeıdi. Esebi boıynsha aramqatqan 28 qustyń shyǵyny 300 myń teńgedeı. Munyń aldynda týra osylaı kórshisiniń de 15 taýyǵyn talap tastaǵan eken.
- Aqpan aıynyń 3-i kúni qaz ben úıregin ıtter talap, óltirgen turǵynnan aryz túsip, ıttiń ıesin anyqtadyq. ÁQK- niń 407- babyna sáıkes ıt ıesi ákimshilik jaýapkershilikke tartyldy. 10 AEK kóleminde aıyppul jazylady. Iti laıka tuqymdas, - dedi Kóksý aýdandyq polıtsııa bóliminiń ýchaskelik polıtsııa ınspektory Talǵat Ospanǵazy.
Al qoı-eshkilerinen aıyrylǵan turǵyndar ıtterdiń mektepten qaıtqan balalarǵa da júgirip, qaýyp alǵan kezderi bolǵanyn aıtady.
- Tańǵy 8-9 dardyń shamasynda dalaǵa shyqsaq qoradaǵy 2 toqtymyzdy ıt jaryp ketken. Onyń aldynda qoranyń ishinde buzaýlardy qýyp júrgenin kórip qýyp shyqqanmyn. Kóshede ıt kóp. Balalarǵa da júgiredi. Itterińizdi baılańyzdar dep WhatsApp chatynda shýlap jatady turǵyndar, - dedi aýyl turǵyny Merýert Maratova.
Turǵyndar kóshede órip júretin ıtterdi burynǵydaı qazir eshkim atpaıtynyna narazy. Mal sadaqa, oqýdan kesh qaıtatyn balalary úshin alańdaıtyndaryn aıtyp otyr.
Shara qoldanýdy suraıdy. Bul máseleni jaýaptylar da jaqsy biledi. Barlyq is-árekettiń tek zań aıasynda ǵana júzege asatynyn eskersek kóshede júrgen ıtterdi atýǵa olardyń da quzireti joq.
- 2024 jyly Kóksý aýdany boıynsha 1735 ıt aýlanyp onyń 400-i chıptelip, kastratsııa jasalyp, qaıta bosatyldy. It atý úshin ruqsat beretin zań joq. Biz tek ıelerine túsindirme jumystaryn júrgizemiz, bazaǵa tirkeımiz, - dedi Kóksý aýdandyq veterınarlyq stantsııasynyń dırektory Ádilbek Alpysbaev.
Eske salaıyq osyǵan deıin Mańǵystaýda jasóspirimdi ıt talap tastaǵanyn jazǵanbyz.