Jetisý oblysynda ınternet-alaıaqtyqpen aınalysqan uıymdasqan qylmystyq top ustaldy

TALDYQORǴAN. KAZINFORM — Internet-alaıaqtardyń uıymdasqan qylmystyq tobyna qatysty qylmystyq is sotqa joldandy. Bul týraly Jetisý oblysy prokýratýrasy málim etti.

Jetisý oblysynda ınternet-alaıaqtyqpen aınalysqan uıymdasqan qylmystyq toptyń qyzmetiniń joly kesildi.

— Qylmyskerler ózderin telefon arqyly banktiń qaýipsizdik qyzmetkerlerimiz dep tanystyryp, senimge ıe bolyp, azamattardy uıaly telefonǵa «AnyDesk» qosymshasyn ornatýǵa májbúrlegen, sol arqyly olarǵa qashyqtan qol jetkizip, basqarýdy qamtamasyz etken. Sodan keıin alaıaqtar bank qosymshalaryn paıdalanyp, azamattarǵa nesıe rásimdegen, — dep jazdy prokýratýradan.

Qylmystyq toptyń áreketinen elimizdiń ár óńiriniń 40-tan astam turǵyny zardap shekti, keltirilgen shyǵyn kólemi 70 mıllıon teńgeden asty.

Sotqa deıingi tergep-tekserý nátıjeleri boıynsha qylmystyq is sotqa joldandy. 

Aıta keteıik, buǵan deıin Pavlodarda «Tık-Tok» arqyly jurtty aldap kelgen qylmystyq toptyń joly kesildi.