Jetisý oblysynda ınternet-alaıaqtardyń call-ortalyǵy áshkere boldy

ASTANA. KAZINFORM — Jetisý oblysynda 57 adamdy aldaýǵa kómektesken zańsyz call-ortalyqtyń qyzmeti toqtatyldy, dep habarlaıdy Polisia.kz.

Jetisý oblysy polıtsııa qyzmetkerleri prokýratýranyń úılestirýimen aýqymdy ınternet-alaıaqtyqpen aınalysqan adamdardyń zańsyz áreketin áshkereledi. Zańsyz shemanyń uıymdastyrýshysy Almaty qalasynyń 23 jastaǵy turǵyny bolyp shyqty. Ol qatysýshylar arasynda mindetterdi naqty bólip, jasyryn call-ortalyq qurǵan.

Alaıaqtar áleýmettik jeliler men Telegram messendjeri arqyly áreket etip, «droptar» men aqshany qolma-qol aınaldyrý servısterin paıdalanǵan.

— Qylmyskerlerdiń zańsyz áreketteriniń saldarynan 57 adam zardap shekti, onyń ishinde jekelegen jábirlenýshiler bir mln teńgeden asatyn qarajatynan aıyrylǵan. Keltirilgen jalpy shyǵyn 36 mln teńgeden asty. Qazir Qazaqstan aýmaǵynda júrgen ózge de kúdiktilerdi anyqtaý jáne ustaý boıynsha jumystar júrgizilip jatyr. Qylmystyq is materıaldary sotqa joldandy, — delingen habarlamada.

Jetisý oblysynyń polıtsııasy azamattardy qyraǵylyq saqtaýǵa, kúmándi qońyraýlar men habarlamalarǵa senbeýge jáne alaıaqtyq faktileri týraly quqyq qorǵaý organdaryna dereý habarlaýǵa shaqyrady.

Osyǵan deıin Almatydaǵy demalys ornynan «oıyn-saýyqqa arnalǵan gaz» tabylǵany belgili boldy.