Jetisý oblysynda halyqty sýmen jabdyqtaý jobalary toqtap qalý múmkin - Ǵalıasqar Sarybaev
ASTANA. KAZINFORM – Búgin Senattyń jalpy otyrysynda depýtat Ǵalıasqar Sarybaev Jetisý oblysy turǵyndaryn sýmen qamtý máselesin kóterdi.
Premer-mınıstrdiń atyna depýtattyq saýal joldaǵan senatordyń aıtýynsha, taza aýyz sýdyń tapshylyǵy men sý qubyrlary jelileriniń joǵary tozýy jyldar boıy halyqtyń ómir súrý deńgeıine keri áser etip, aýrý-syrqaýdyń ósýine, áleýmettik jáne ekonomıkalyq ınfraqurylymnyń damýyn tejep, kóshi-qon úderisterin kúsheıtip otyr.
- 2023-2025 jyldary oblysta jalpy sommasy 25,9 mıllıard teńgeni quraıtyn 4 eldi mekende sýmen jabdyqtaý júıeleriniń qurylysy, 15 eldi mekende aýyz sý júıelerin jańǵyrtý jumystaryn júrgizý josparlaǵan. Osy jobalardy iske asyrý úshin respýblıkalyq bıýdjetten 13,6 mıllıard teńge bólý týraly usynym jiberilgen. Alaıda, respýblıkalyq jáne jergilikti bıýdjetten respýblıkalyq bıýdjetti naqtylaý kezinde qarajattyń qosymsha túsimi esebinen Ulttyq qor men respýblıkalyq qazynadan bar bolǵany 8 jobaǵa 2,5 mıllıard teńge bólingen. 2025 jyly Alakól, Eskeldi, Kerbulaq, Panfılov aýdandarynyń 7 eldi mekeninde, Taldyqorǵan jáne Tekeli qalalarynda sýmen jabdyqtaý júıelerin qaıta jańartý jáne salý jumystary bastalǵan. Búgingi kúni jobalar ishinara júzege asyrylýda jáne qosymsha qarjylandyrýsyz jumystardyń toqtap qalý qaýpi bar, - dedi senator.
Osy oraıda Ǵalıasqar Sarybaev atalǵan jobalardy ýaqytyly iske asyrýdyń strategııalyq mańyzdylyǵyn atap ótip, Premer-ınıstrdi Prezıdent tapsyrmalarynyń oryndalýyn qatań baqylaýǵa alyp, bıýdjet ótinimderin kezeń-kezeńimen qoldaýǵa jáne Jetisý men jalpy eldiń áleýmettik turaqtylyǵy men turaqty damýyn qamtamasyz etýge baǵyttalǵan barlyq ınfraqurylymdyq bastamanyń júzege asýyna yqpal etýge shaqyrdy.
Aıta keteıik, búgin Senattyń jalpy otyrysynda «2004 jylǵy 22 jeltoqsandaǵy Qazaqstan Úkimeti men Reseı Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» Zań ımaquldandy.