Jetisý oblysynda esirtkini jarnamalaǵan turǵyn bas bostandyǵynan aıyryldy
ASTANA. KAZINFORM – Jetisý turǵyny esirtki saıttarynyń jarnamasyn graffıtı arqyly taratqany úshin 3,6 jylǵa bas bostandyǵynan aıyryldy.
Jetisý oblysy Kóksý aýdandyq soty qoǵamdyq oryndarda tyıym salynǵan ınternet-resýrstardy zańsyz jarnamalaýmen aınalysqan jergilikti turǵynǵa qatysty úkim shyǵarǵanyn jarııalady, ol zańdy kúshine endi.
Sot barysynda sottalýshy K. zańsyz bıznes uıymdastyrýshylarymen aldyn ala sóz baılasyp, tyıym salynǵan aqparatty taratý jónindegi qyzmetterdi atqarýǵa keliskeni anyqtaldy. Ol markerlerdi qoldana otyryp, Balpyq bı aýylyndaǵy qorshaýlarǵa, qaqpalarǵa jáne elektr berý jelileriniń tirekterine baqylaýdaǵy ınternet-resýrstardyń siltemeleri bar graffıtı-jazýlaryn salyp, sońynan kýratorlarǵa koordınattar kórsetilgen fotoesep jibergen.
Halyqtyń densaýlyǵy men qoǵamdyq ımandylyqqa qarsy jasalǵan qylmystyń aýyrlyǵyn, sondaı-aq istiń mán-jaıyn eskere otyryp, sot K.-ny 3 jyl 6 aıǵa bas bostandyǵynan aıyrý jazasyna kesti.
Oblystyq sottyń qylmystyq ister jónindegi apellıatsııalyq satysy úkimdi ózgerissiz qaldyrdy.
Úkim zańdy kúshine endi.
Jetisý oblysynyń prokýratýrasy esirtki quraldaryn, psıhotroptyq zattar men olardyń analogtaryn kez kelgen nysanda (graffıtı-jazýlar, áleýmettik jelilerdegi jazbalar jáne messendjerler arqyly) nasıhattaý nemese zańsyz jarnamalaý QR QK-niń 299-1-baby (esirtki quraldaryn, psıhotroptyq zattardy, olardyń analogtaryn jáne prekýrsorlardy nasıhattaý nemese zańsyz jarnamalaý) boıynsha aýyr qylmys bolyp tabylatynyn jáne qylmystyq jaýapkershilikke ákep soǵatynyn eske saldy.
Esirtki qylmysynyń jolyn kesý jáne qoǵamdyq qaýipsizdikti qamtamasyz etý – qadaǵalaý organynyń basty basymdyǵy.
Elimizde jyl basynan beri 17 esirtki zerthanasy joıylǵanyn jazǵan edik.
