Jetisý oblysynda esirtki ótkizýmen aınalysqan uıymdasqan toptyń qyzmeti toqtatyldy

Bas prokýratýranyń málimetinshe, júrgizilgen jedel-izdestirý is-sharalary barysynda qylmystyq toptyń 8 qatysýshysy ustaldy. Qylmystyq is qujattaryna sáıkes, qylmystyq áreket shetelden úılestirilgen. Uıymdastyrýshy sıntetıkalyq esirtki zattaryn jetkizýdi qamtamasyz etip, top músheleri arasynda mindetterdi bólgen, jasyryn oryndardyń koordınattaryn jibergen, qylmystyq tapsyrmalardyń oryndalýyn baqylaǵan, sondaı-aq krıptovalıýta arqyly esep aıyrysýdy júzege asyrǵan.

— Aldyn ala anyqtalǵandaı, uıymdasqan top músheleri uıymdastyrýshynyń nusqaýy boıynsha Taldyqorǵan, Almaty, Qonaev, Qaskeleń jáne Pavlodar qalalarynyń aýmaǵynda jasyryn oryndar daıyndaǵan. Júrgizilgen tergeý jáne jedel is-sharalar barysynda quramynda sıntetıkalyq esirtki zaty «mefedron» bolýy múmkin untaq tárizdi zat salynǵan oramalar, sot saraptamasyna joldanǵan ózge de zattar, dáleldemelik mańyzy bar aqparattar saqtalǵan uıaly telefondar, sondaı-aq «Exodus»krıptovalıýta ámııany arqyly júrgizilgen esep aıyrysýlar týraly málimetter tárkilendi, — dep habarlady vedomstvo.

Anyqtalǵan barlyq faktiler boıynsha Qazaqstan Respýblıkasy Qylmystyq kodeksiniń 297-baby boıynsha qylmystyq ister tergelip jatyr. 

Qazirgi ýaqytta uıymdastyrýshynyń jeke basyn, onyń ornalasqan jerin, esirtki zattaryn jetkizý arnalary men zańsyz áreketke qatysy bar ózge de tulǵalardy anyqtaýǵa baǵyttalǵan tergeý jáne jedel-izdestirý is-sharalary júrgiziledi.

Sotqa deıingi tergep-tekserý barysy Jetisý oblysy prokýratýrasynyń baqylaýynda.  

Eske salaıyq, buǵan deıin Astana turǵynynyń páterinen 100-den astam esirtki dozasy tabylǵanyn habarlaǵanbyz.