Jetisý oblysynda erekshe balalarǵa arnalǵan tuńǵysh ıppoterapııa ortalyǵy ashyldy
TALDYQORǴAN. KAZINFORM – Jetisý oblysynda erekshe qajettiligi bar balalarǵa arnalǵan tuńǵysh ıppoterapııa ortalyǵy ashyldy. Nysan Jarkent qalasyndaǵy «Mereı» balalardy ońaltý ortalyǵynyń bazasynda ornalasqan. Munda erekshe qajettiligi bar balalardy atqa mingizý arqyly em jasalady. Bul týraly Jetisý oblysy ákiminiń baspasóz qyzmeti habarlady.
Ortalyqtyń ashylýyna oblystyq jumyspen qamtýdy úılestirý jáne áleýmettik baǵdarlamalar basqarmasy qoldaý kórsetken.
– Erekshe qajettilikteri bar balanyń dúnıege kelýi – ata-ana úshin úlken jaýapkershilik. Ondaı balalardyń qoǵamnyń tolyqqandy múshesi bolyp ósýine memleket barlyq múmkindikti jasap keledi. Ońaltý ortalyqtarynyń, túzetý kabınetteriniń qyzmeti arqasynda balalar densaýlyǵyn jaqsartýǵa, paıdaly daǵdylardy ıgerýge, qoǵamǵa beıimdelýge naqty múmkindik alyp otyr. Osy rette Jarkentte ashylǵan búgingi ıppoterapııa ortalyǵynyń da úlesi zor bolady dep senemiz, - dedi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Sanııa Dúısenbiqyzy.
Ortalyq dırektory Gúlnaz Kıbraevanyń aıtýynsha, aýdany 400 sharshy metr bolatyn angarlyq tıptegi jabyq manej sapaly jylý oqshaýlaǵysh materıaldardan qysqa merzim ishinde turǵyzylǵan. Bul ıppoterapııa sabaqtaryn qysta da ótkizýge múmkindik beredi.
– Bizdiń «Mereı» balalardy ońaltý ortalyǵy 2022 jyly ashyldy. Munda sodan beri 40 tárbıelenýshi beıimdeý men ońaltýdan turaqty túrde ótýde. Solardyń tórteýi qoǵamǵa sátti beıimdelip, mektepke, balabaqshaǵa baryp júr. Endi, mine, ortalyqtyń em sharalaryna ıppoterapııa baǵyty qosylyp otyr. Balalar ıppoterapııadan em alsa, aıaqqa turyp, júrýi jaqsarady, arqa bulshyq etteri nyǵaıa túsedi, vestıbýlıarlyq apparaty jattyqtyrylady. Jalpy ıppoterapııa densaýlyqty jaqsartýmen qatar odan ári damýyna úlken yqpal etedi, - deıdi G. Kıbaeva.
Adaptıvti atpen júrý sabaqtaryn aptasyna úsh ret ótkizý josparlanǵan. Ol úshin ortalyq basshylyǵy erekshe qajettiligi bar balalarǵa kómektesýge yqylas bildirgen «Beknur» sharýa qojalyǵynan «Aqboz» jáne «Admıral» atty eki jylqyny jalǵa alyp otyr. Bul jylqylardy emge paıdalanýǵa medıtsınalyq bilimi bar emdik dene shynyqtyrýdyń tájirıbeli eki nusqaýshy kómektesedi.
Óz kezeginde psıhologtar men dárigerlerdiń qorytyndysy men usynystary boıynsha balalar em alyp, atqa minýdi bastaıdy. Máselen, tórt jasar Mádıdi ájesi Shákızat Slamjanova ortalyqqa bir jarym jasynda alyp kelgen. Bala alǵashynda aıaǵyn basyp júre almaǵan, aınalasymen qarym-qatynasy da qıyn bolatyn. Ózge de ońaltý sharalarymen qatar Mádı búgin nusqaýshylardyń kómegimen alǵash ret atqa otyryp, ıppoterapııany bastady.
Sol sııaqty 8 jasar Madııardyń anasy Maqpal Óskenbaeva da álemge tanymal osy ońaltý ádisi balalarǵa kómektesetinine senimdi.
– Biz ıppoterapııa ashý ıdeıasy qolǵa alynatyny týraly alǵash ret ótken jyly estidik. Oblys basshylyǵynyń qoldaýymen osy ıgi bastama iske asyrylǵany qýanyshtymyz. Mundaǵy materıaldyq-tehnıkalyq jaraqtandyrý, zamanaýı jabdyqtar men trenajerler, emdik dene shynyqtyrýlary balalarymyzdyń saýyǵýyna, óz-ózine degen senimderin nyǵaıtýǵa yqpal etedi degen úmitpen kelip otyrmyz, - dedi M. Óskenbaev.
Manejde montýar, ıaǵnı balalardy atqa otyrǵyzýǵa arnalǵan arnaıy baspaldaq ornatylyp, qaýipsizdik maqsatynda jattyǵý alańyna qum tóselgen. Sonymen qatar munda jaryqtandyrý júıesi bar, ata-analar men mamandar protsesti syrttan baqylaı alatyndaı qorshaýlar ornatylǵan.
Jalpy búgingi kúni «Mereı» ortalyǵynda tirek-qımyl apparaty zaqymdanǵan, Daýn sındromy jáne basqa da aýrýlary bar 3 jastan 18 jasqa deıingi balalarǵa 56 bilikti maman, solardyń ishinde pedagog-tárbıeshi, ádisker, dáriger-nevropatolog, pedagog-psıholog, logoped, psıhıatr, defektolog, ortoped, massajıst, emdik dene shynyqtyrý jáne júzý nusqaýshylary, dene shynyqtyrý oqytýshysy, sondaı-aq orta medıtsınalyq qyzmetkerler qyzmet kórsetedi. Tárbıelenýshilerge yńǵaıly bolý úshin balalardy qaýipsiz tasymaldaýǵa beıimdelgen eki «Vıraj» GAZel bar.