Jetisý oblysynda er adam bir aı ishinde dúkennen 600-den astam shokolad urlaǵan
ASTANA. KAZINFORM – Bir aı ishinde saýda ortalyǵynan barlyǵy 625 dana shokolad urlanǵan.
Jarkent qalasynda polıtseıler urlyq deregin ashty. Bul joly kúdiktiniń basty oljasy aqsha nemese qymbat tehnıka emes, shokolad bolǵan.
Polıtsııaǵa qaladaǵy saýda ortalyqtarynyń biriniń ókili júginip, dúkennen shokoladtardyń júıeli túrde joǵalyp jatqanyn habarlaǵan. Beınebaqylaý kameralaryndaǵy jazbalardy zerdeleý barysynda qaýipsizdik qyzmeti bir er adamnyń birneshe apta boıy dúkenge turaqty kelip, shokoladtardy sómkesi men qaltalaryna jasyryp, tólem jasamaı shyǵyp ketetinin anyqtaǵan.
Tekserý barysynda kúdiktiniń birdeı tásilmen áreket etkeni belgili boldy. Ol dúkenge kirip, aınalasyndaǵylardyń nazaryn baqylaı otyryp, shokoladtardy jeke zattaryna salyp, kassadan tólem jasamaı shyǵyp ketken. Arada birneshe mınýt ótken soń qaıta oralyp, osy áreketin qaıtalaǵan. Keı kúnderi osyndaı «reıdti» 5-6 ret jasaǵan.
Bir aı ishinde saýda ortalyǵynan barlyǵy 625 dana shokolad urlanǵan. Keltirilgen materıaldyq shyǵyn kólemi 530 myń teńgeden asty.
Jedel-izdestirý is-sharalarynyń nátıjesinde Panfılov aýdandyq polıtsııa bóliminiń qyzmetkerleri Jarkent qalasynyń 41 jastaǵy turǵynyn anyqtap, polıtsııa bólimine jetkizdi. Kúdikti óz kinásin tolyq moıyndady.
Atalǵan fakti boıynsha sotqa deıingi tergep-tekserý amaldary júrgizilip jatyr. Oqıǵanyń barlyq mán-jaıy anyqtalýda. Sondaı-aq kúdiktiniń osyǵan uqsas ózge de qylmystarǵa qatysy bar-joǵy tekserilip jatyr.
Aıta ketelik Qaraǵandyda qaraqshylyq shabýyl men urlyq jasaǵan er adam ustalǵan edi.
