Jetisý oblysynda er adam medbıkege shabýyl jasady
ASTANA. KAZINFORM — Kóksý aýdanynyń Jetijal aýylynda medıtsınalyq kómekke júginý qylmystyq iske ulasty. Patsıent qabyldaýdy kútpeı, medbıkege soqqy jasady, dep habarlaıdy Kazinform tilshisi.
Jetisý oblystyq sotynyń habarlaýynsha, is Kóksý aýdandyq sotynda qaraldy.
— 2026 jylǵy 4 naýryzda shamamen saǵat 14:30-da mas kúıinde kelgen sottalýshy medıtsınalyq pýnktke kómek surap kelgen. Alaıda ony dereý qabyldamaǵanyna ashýlanyp, medbıkemen janjaldasyp, judyryq ala júgirgen, — delingen oblystyq sot habarlamasynda.
Soqqynyń qatty bolǵany sonshalyq áıel oryndyqtan qulap, dene jaraqattaryn aldy. Sot-medıtsınalyq saraptama onyń densaýlyǵyna ortasha aýyrlyqtaǵy zııan keltirilgenin kórsetti.
Sottalýshynyń áreketteri QR QK 107-babynyń 2-bólimi 2-tarmaǵy boıynsha — qyzmet barysynda densaýlyqqa ortasha aýyrlyqta qasaqana zııan keltirý dep baǵalandy.
Sotta er adam kinásin moıyndap, ókingenin aıtty. Jábirlenýshi ony keshirmeıtinin aıtyp, qatań jaza qoldanýdy surady.
Sot jaza taǵaıyndaǵanda quqyqbuzýshylyqtyń sıpatyn, sottalýshynyń tulǵasyn, sondaı-aq jeńildetetin jáne aýyrlatatyn jaǵdaılardy eskere otyryp sheshim qabyldady.
— Sot úkimimen er adam kináli dep tanylyp, bir jylǵa bas bostandyǵynan aıyryldy. Úkim áli zańdy kúshine engen joq, — delingen habarlamada.
Buǵan deıin Astanada feldsherge qol kótergen aıyptalýshy 1,5 jylǵa sottalǵanyn jazǵan bolatynbyz.
