Jetisý oblysynda ekpeden bas tartqan balalar jappaı qyzylsha juqtyryp jatyr

 Jetisý oblysynda qyzylsha ásirese vaktsına almaǵan balalar arasynda kóp tirkelip jatyr, dep habarlaıdy Kazinform agenttigi.

Jetisý oblystyq sanıtarııalyq-epıdemıologııalyq baqylaý departamenti basshysynyń dereginshe, jyl basynan beri qyzylshanyń 255 jaǵdaıy tirkelgen, onyń 186-da syrqat zerthanalyq jaǵdaıda rastaldy.

14 jasqa deıingi balalar — 155 (83,3%), 15-19 jas — 4 (2,2%), 20 jastan joǵary — 27 (14,5%).

Máselen, aýyrǵandardyń 87,6 paıyzy — vaktsınatsııadan ótpegen balalar.

«Inkýbatsııalyq kezeń 7-21 kún aralyǵyna sozylady, juqpa kózi — naýqas adam. Aýrý aýa-tamshy joldary arqyly naýqas adam sóılegende, jótelgende nemese túshkirgende beriledi. Aýrý óte juqpaly, ıaǵnı buryn syrqattanbaǵan adamǵa qyzylshamen aýyratyn naýqaspen qarym-qatynas jasaǵanda syrqattaný qaýpi óte joǵary (egilmegen jaǵdaıda). Vırýs aýada 2 saǵatqa deıin belsendi jáne juqpaly bolyp qalady», — dedi Jetisý oblystyq sanıtarııalyq-epıdemıologııalyq baqylaý departamenti basshysy Ashat Charapıev.

Spıker qyzylsha juqpasy men aýrýdyń asqynýynyń aldyn alýdyń tıimdi joly vaktsınatsııa ekenin eske saldy.

«Infektsııaǵa qarsy eń qol jetimdi jáne tıimdi shara vaktsınatsııa. Qyzylshaǵa qarsy vaktsına 20 jylǵa deıin saqtalatyn ımmýnıtet qalyptastyrady. Ulttyq kúntizbege sáıkes aldyn alý ekpesi josparly túrde 12-15 aıda jáne qaıta egýi 6 jasta júrgiziledi. Qyzylshanyń arnaıy emi joq, biraq vaktsınatsııa arqyly syrqattan qorǵanýǵa bolady» — dedi maman.

Aıta keteıik, qyzylsha — aýa-tamshy joldary arqyly juǵatyn jiti vırýstyń ınfektsııa.