Jetisý oblysynda ekonomıkanyń ósý qarqyny 112,9% jetti - ákim

Bıyl Jetisý oblysynyń damý kórsetkishi aıtarlyqtaı ósken. Bul týraly Jetisý oblysynyń ákimi Beıbit Isabaev málim etti, dep habarlaıdy Kazinform.

«Bıyl 6 aıdyń qorytyndysy boıynsha jalpy óńirlik ónimniń kólemi 12,6%-ǵa ósip, 695,5 mlrd teńgeni qurady. Osy jyldyń 10 aıynda barlyq ındıkatorlar boıynsha jospar artyǵymen oryndaldy. Ekonomıkanyń ósý qarqyny — 112,9%. Byltyr 104% bolǵan. Bul — respýblıka boıynsha eń joǵarǵy kórsetkishtiń biri. Salalar boıynsha qurylys jumystarynyń kólemi 1,5 ese ulǵaıdy, turǵyn úıdi paıdalanýǵa berý — 22,6%, saýda — 1,6 ese ósti», — dedi Beıbit Isabaev ortalyq kommýnıkatsııalar qyzmeti alańynda ótken baspasóz máslıhatynda.

Jyl basynan beri oblys ekonomıkasyna 20% ósimmen 240,7 mlrd teńge ınvestıtsııa tartylǵan, onyń ishinde jeke ınvestıtsııa — 143,4 mlrd teńge.

«Memlekettik bıýdjetke túsim 241 mlrd teńgeni qurady. Respýblıkalyq bıýdjetke 180 mlrd teńge tústi. Bul ótken jylmen salystyrǵanda 1,7 ese kóp, jergilikti bıýdjetke túsken túsim 25% ósip, 60 mlrd teńgeni qurady», — deıdi ol.