Jetisý oblysynda daıyn turǵan kóppáterli 6 turǵyn úı bos tur

ASTANA. KAZINFORM – Joǵary aýdıtorlyq palata elimizdiń birqatar óńirinde paıdalanýǵa berilgenimen qańyrap bos turǵan úılerge tekserý júrgizdi.

«QR Joǵary aýdıtorlyq palatasy 2024 jylǵa arnalǵan memlekettik aýdıt nysandarynyń tizilimine sáıkes, Abaı, Almaty, Ulytaý jáne Jetisý oblystarynda aýdıtorlyq is-sharalar júrgizdi. Aýdıtorlyq is-sharalardyń qorytyndysynda Jetisý oblysynda memlekettik satyp alýdan bólek protsedýra arqyly túrli merdiger uıymdar satyp alǵan abattandyrý, jylýmen qamtamasyz etetin syrtqy jeliler, sýmen jabdyqtaý, kárizdendirý, telefon ornatý jumystarynyń sozylyp ketkeni anyqtaldy. Osy jaıt paıdalanýǵa berilgen jalpy quny shamamen 5 870,9 mln teńge bolatyn 60 páterli tórt, 80 páterli eki úıdiń 1,5 jyldan astam ýaqyt boıy bos turyp qalýyna sebep boldy», - dedi vedomstvodan agenttiktiń resmı saýalyna oraı.

Palatanyń atap ótýinshe, atalǵan úıler áleýmettik jaǵynan qorǵalmaǵan 400 otbasynyń baspana máselesin sheshýi tıis bolatyn. Atalǵan otbasylar páterlerin áli kútip otyr.

«Dál osyndaı fakti Ulytaý oblysynda anyqtaldy. Onda Jezqazǵan qalasynyń magıstraldy jylý júıesindegi problema 2023 jyly salynǵan quny 557,6 mln teńge bolatyn turǵyn úıdiń tolyqtaı bos turýyna sebep bolyp otyr», - delingen palata jaýabynda.