Jetisý oblysynda bıýdjet qarajatyn jumsaý kezindegi zań buzýshylyqtardyń joly kesildi
TALDYQORǴAN. KAZINFORM – Jetisý oblysynyń prokýratýrasy memlekettik satyp alý salasynda zańdylyqty qamtamasyz etý jáne bıýdjet qarajatyn qorǵaý maqsatynda josparsyz mindettemelerdi oryndaý jáne memlekettik resýrstardy maqsatsyz paıdalaný faktileriniń aldyn alý boıynsha júıeli jumystardy júrgizip keledi.
Taldaý nátıjesinde Qaratal aýdanynyń prokýratýrasy áleýmettik jobalardy júzege asyrý kezinde eleýli buzýshylyqtardy anyqtady. Aýyldyq okrýgterdiń birinde salynǵan «Balalar oıyn alańy» nysany oryndalǵan jumystardyń bekitilgen tehnıkalyq talaptarǵa sáıkes emestigine qaramastan, paıdalanýǵa qabyldanǵany belgili boldy.
Sonymen birge, tapsyrys berýshi merzimin buzǵan merdigermen shartty buzý týraly zań talaptaryn oryndamaǵan.
Prokýrorlyq qadaǵalaý aktisi negizinde aýyldyq okrýg ákimi memlekettik qyzmettiń bedelin túsirý faktisi boıynsha tártiptik jaýapkershilikke tartylyp, qyzmetine sáıkes emestigi týraly eskertý berildi. Sonymen qatar oǵan 60 AEK kóleminde (129 750 teńge) ákimshilik aıyppul salyndy.
Qazirgi ýaqytta merdiger uıym anyqtalǵan kemshilikterdi joıý jumystaryn qolǵa aldy.
Jetisý oblysynyń prokýratýrasy memlekettik sektordyń ashyqtyǵyn qamtamasyz etý jáne memlekettiń ekonomıkalyq múddelerin qorǵaý boıynsha jumystaryn jalǵastyryp jatyr.
Budan buryn jyl basynan bıýdjettiń shyǵystary qanshalyqty oryndalǵanyn jazǵan edik.
