Jetisý oblysynda bilim bóliminiń esepshisi qarjy jymqyrdy degen kúdikke ilindi
Jetisý oblysynyń prokýratýrasy bıýdjet qarajatyn jymqyrý faktilerin tekserip jatyr, dep habarlaıdy oblystyq prokýratýranyń baspasóz qyzmeti.
Máselen, Jetisý oblysy Kerbulaq aýdanynyń bilim bóliminiń esepshisi muǵalimderge jalaqy men demalys aqysyn joǵarylatyp zańsyz tólep, sondaı-aq múldem jumys istemeıtin adamdarǵa 34 mıllıon teńge jalaqy tólep, bıýdjet qarajatyn jymqyrdy degen kúdikke ilindi.
Ekinshi bir jaǵdaıda Sarqan aýdanynyń ákimdigi týrıstik oryndardaǵy ornatylmaǵan sanıtarlyq-gıgıenalyq toraptar úshin 29 mıllıon teńgeden astam aqsha tólegen.
Osy faktiler boıynsha Jetisý oblysy prokýratýrasynyń Sotqa deıingi tergep-tekserý basqarmasy Qylmystyq kodekstiń 189-babynyń 4-bóliginiń 2-tarmaǵy (erekshe iri kólemdegi jymqyrý ) boıynsha sotqa deıingi tergep-tekserýdi bastady.
«Bul baptyń sanktsııasynda belgili bir laýazymdardy atqarýǵa nemese belgili bir qyzmetpen aınalysýǵa tyıym sala otyryp, 12 jylǵa deıin bas bostandyǵynan aıyrý jazasy qarastyrylǵan»,-delingen Jetisý oblystyq prokýratýrasynyń baspasóz qyzmeti taratqan aqparatta.
