Belsendi uzaq ómir súrý ortalyǵyna kúndelikti 250 jetisýlyq zeınetker barady
TALDYQORǴAN. KAZINFORM — Osy jyldyń basynda Taldyqorǵanda Belsendi uzaq ómir súrý ortalyǵy ashylǵan bolatyn. Qazir bul nysanǵa kúnine 250-den astam adam keledi.
Munda 12 túrli qyzmet kórsetiledi, 40-qa jýyq jumys orny ashylǵan.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaevtyń aıtýynsha, Taldyqorǵannyń ózinde 25 myńǵa jýyq zeınetker turady. Sondyqtan oblys ákiminiń tapsyrmasy boıynsha Eńbek resýrstary jáne belsendi uzaq ómir súrý ortalyǵyn qurý týraly sheshim qabyldanǵan.
— Ortalyqtyń negizgi maqsaty — mádenı, shyǵarmashylyq, sporttyq jáne iskerlik qabiletterin shyńdaý arqyly zeınet jasyndaǵy adamdardyń fızıkalyq jáne psıhıkalyq saýlyǵyn nyǵaıtý. Ortalyqqa kún saıyn 250-den astam adam keledi. Jyl basynan 50-den astam is-shara, sondaı-aq Aqsý, Kerbulaq, Qaratal aýdandarynyń kıeli oryndaryna, tarıhı nysandaryna ekskýrsııalar, Abaı oblysynyń Semeı qalasyna sapar uıymdastyryldy. Taldyqorǵannyń zeınetkerlik jastaǵy kez kelgen turǵyny bizdiń ortalyqqa kele alady. Munda barlyq qyzmetter tegin kórsetiledi. Tek jeke kýáligi men zeınetker kýáligin alyp kelýi kerek, — dedi ortalyq basshysy Áset Orazbekuly.
Ortalyqqa kelýshiler mundaǵy qolaıly jaǵdaıǵa rıza. Solardyń biri - Saıra Ahmetova.
— Belsendi uzaq ómir súrý ortalyǵyna ashylǵannan beri turaqty kelemin. Fıtnespen, ıogamen, bımen aınalysamyn. Emdik massaj kýrsynan óttim. Bir jaǵynan densaýlyqqa paıdaly, ekinshiden aralasatyn ortań keńeıedi, bul biz úshin óte mańyzdy. Qalasaq, til úırenýge de jaǵdaı jasalǵan. Munda árkim óz qalaýyna qaraı aınalysatyn is tabady. Ortalyqty qurǵan úshin alǵys aıtamyn, — dedi ol.
