Jetisý oblysynda «Aýyl amanaty» jobasy qalaı júzege asyp jatyr
Elimizde aýyldyq óńirlerdi mekendeıtin adamdardyń áleýmettik jaǵdaıy qala turǵyndaryna qaraǵanda kóp tómen. Mundaı teńsizdikti boldyrmaý úshin memlekettiń qoldaýy qajet. Qazir júzege asyp jatqan «Aýyl amanaty» baǵdarlamasy osy maqsatty kózdeıdi, dep habarlaıdy Kazinform.
Jetisý oblysynda halyqtyń 55 paıyzy aýyldyq óńirde turady. Sáıkesinshe, eldiń negizi kún kórisi aýyl sharýashylyǵy bolyp otyr. Aımaqta 387,6 myń adam nápaqasyn mal baǵyp, egin egip taýyp júr. Demek, oblys halqynyń deni aýyldyq jerde shoǵyrlanǵandyqan aýyl halqynyń turmystyq jaǵdaıyn kóterý ózekti másele sanalady. Sol sebepten de óńirde «Aýyl amanaty» baǵdarlamasy suranysqa ıe.
Bıyl «Aýyl amanaty» baǵdarlamasyn iske asyrý maqsatynda oblysqa 3 201,0 mln teńge qarjy bólingen. Qarasha aıyna deıin baǵdarlama aıasynda 2911,5 mln teńgege 512 ótinim maquldanyp, 1959,8 mln teńgege 332 adam nesıe alǵan. Taǵy da 951,7 mln teńgege 180 ótinimdi qarjylandyrý boıynsha qujattar resimdelip jatyr.
Bólingen qarajatqa 700-den astam iri qara mal, 2,3 myń usaq mal jáne 500-ge jýyq jylqy satyp alý josparlanyp otyr. Sonymen qatar, bıznestiń basqa baǵyttary boıynsha 37 jobany iske asyrý kózdelgen, onyń ishinde tamaq ónimderin óndirý boıynsha 8 ótinim maquldandy, jıhaz jáne qurylys materıaldaryn óndirý boıynsha 5 ótinim, týrızm jáne ósimdik sharýashylyǵy salasynda 2 jobadan, arnaıy tehnıka satyp alý boıynsha 6 jáne túrli qyzmetter kórsetý boıynsha 14 joba bar.
«Jalpy aýyl sharýashylyǵy kooperatsııasy ınstıtýtyn damytý maqsatynda aýyl sharýashylyǵy kooperatıvteri úshin jabdyqtar men tehnıka satyp alýǵa 138 mln teńge rezervke qoıylyp, búginge deıin 2 kooperatıvke 50 mln teńge berildi. Bul qatarda et ónimderin óndirý boıynsha mal azyǵyn daıyndaýdan bastap, mal bordaqylaý, óńdeý jáne daıyn ónimin ózderiniń satý núktesinde halyqqa ótkizýdi qamtıtyn tolyq tsıkldy jáne mal azyǵyn daıyndaý boıynsha mamandanǵan kooperatıvter bar», — deıdi Jetisý oblystyq aýyl sharýashylyǵy basqarmasy basshysynyń orynbasary Janar Turysjanqyzy.
