Jetisý oblysynda aýyl ákiminiń basy daýǵa qaldy
TALDYQORǴAN. KAZINFORM — Aqsý aýylynyń turǵyny Ásem Bókenova aýyl ákiminiń ústinen aryz jazdy. Kópbalaly ana sheneýnikti tún ortasynda terezeden kirip, zorlyq kórsetpek boldy dep aıyptap otyr.
36 jastaǵy Ásem Bókenova aýyldyq ákimshilikte bas maman bolyp jumys isteıdi. Ol ótken shilde aıynyń 31-i kúni kútpegen jaǵdaıǵa tap bolǵanyn jetkizdi. Kelinshek tún ishinde shyrt uıqyda jatqanda úıine bóten adam kirip kórpesin ashqanyn aıtady.
«Saǵat 02.30 shamasynda uıyqtap jatsam, tý syrtymnan bireý kelip ish kıimimdi tartady. Basynda túsingen joqpyn. Anyqtap qarasam dáý bireý pys-pys etip, ishimdik ıisi shyǵyp otyr eken. Shoshyp júgirip baryp as úıdiń jaryǵyn jaqsam jańaǵy ákim», - deıdi Ásem Bókenova.
Al, Іlııas Raıymqulov qolastyndaǵy qyzmetkeriniń sózin joqqa shyǵaryp otyr. Ol Ásem Bókenovanyń úıindegi dúkenge barǵanyn, biraq jabyq bolǵan soń qaıtyp ketkenin aıtady. Sondaı-aq, ákim bul ózin qyzmetten alý úshin ádeıi jabylǵan jala dep topshylaıdy.
«Bul kisi burynǵy ákimniń kezinde jumysqa kelmeı úıde jatyp aqsha alatyn. Sol kisini qoldap maǵan qarsy shyǵyp jala jaýyp otyr qazirgi ýaqytta. 31-nen 1-ne qaraǵan túni dúkenge barǵanymyz ras. Janymda dosym men áıelim boldy. Dúken jabyq eken. Qońyraýyn bastyq, esigin taqyldattyq. Sodan biz qaıtyp kettik ol jerden. Bul kisi sumdyq jaǵdaıdy aıtyp otyr ǵoı, sondaı jaǵdaı bolǵan bolsa, ne sebepti birden polıtsııa qyzmetkerlerine habarlaspady? Erteńinde tústen keıin biraq habarlasqan», - deıdi Aqsý aýyldyq okrýginiń ákimi Іlııas Raıymqulov.
Bul jaǵdaıǵa qatysty QR Qylmystyq kodeksiniń 149-baby 2-bóligi boıynsha is qozǵalǵan. Alaıda, Ásem Bókenova bul bappen kelispeıtinin jetkizdi. Іs Aqsý aýdandyq sotynda qaralyp jatyr, kelesi sot otyrysy 24 qyrkúıekte ótedi dep josparlanǵan.
Eske salaıyq buǵan deıin Jetisý oblysynda alaıaqtyq jolmen aqsha alǵan prokýror jaıly jazǵanbyz.
