Jetisý oblysynda aýanyń lastaný deńgeıi tómen
TALDYQORǴAN. KAZINFORM - Jetisý oblysyndaǵy ekologııalyq jaǵdaı salystyrmaly túrde qolaıly. Ekomonıtorıng nátıjeleri boıynsha oblys ortalyǵy men Tekeli qalasynyń atmosferalyq aýasynyń lastaný deńgeıi tómen.
Oblys boıynsha shyǵaryndylardyń jalpy kólemi 2023 jyly 52 myń tonnaǵa jetse, 2024 jyldyń 1-shi jarty jyldyǵynda — 9,7 myń tonna bolǵan. Onyń 45% — energetıka obektilerine, 20% ónerkásip pen qurylysqa tıesili. 2021 jyldan beri ekologııalyq ınfrakurylymdy
jaqsartý boıynsha sharalar iske asyrylýda.
Taldyqorǵan qalasy men Eskeldi, Kóksý aýdandary boıynsha 6 qazandyq gazǵa aýystyryldy. 3,5 mlrd teńge somasynda turmystyq qatty qaldyqtarǵa arnalǵan polıgondar salynyp, rekýltıvatsııa boıynsha 3 jobany iske asyrý josparlanýda.
Aıta ketetini oblys turǵyndary arasynda kóp kıkiljiń týdyratyn máseleniń biri káriz ben ortalyqtandyrylǵan sý júıeleri edi. Jaýapty mamandar ony jergilikti atqarýshy organdarǵa ekologııalyq tólemderden túsetin qarajat esebinen sheshýdi usynǵan.
«Oblysta ortalyqtandyrylǵan sý burýmen 358 eldi mekennen barlyǵy 13 nemese 3,6% qamtylǵan. Tekeli qalasynyń tazartý qurylystary qanaǵattanarlyqsyz jaǵdaıda. Máselen, „Tekeli sý qýbyry“ ShJQ MKK-ne júrgizilgen jospardan tys tekserý barysynda zerthanalyq synamalar nátıjeleri boıynsha ekologııalyq buzýshylyqtar anyqtaldy. 560 mln teńge kóleminde aıyppul salyndy.
Tazartý qurylystary boıynsha sáıkessizdikter Jetisý oblysynyń basqa aýdandarynda da kezdesedi. Jóndeý jumystaryn júrgizý jáne tazartý qurylystaryn qaıta jańartý qajet.
Qaldyqtarmen jumys isteý máselelerine erekshe toqtalǵym keledi. Osy jyldyń 11 aıynyń qorytyndysy boıynsha qaldyqtardy qaıta óńdeý jáne kádege jaratý 11,65% boldy. Bul — óte tómen kórsetkish. Respýblıka boıynsha ortasha deńgeı — 24%», — dedi Jetisý oblysy boıynsha bas memlekettik ekologııalyq ınspektordyń mindetin atqarýshy Erasyl Bekjanov.
Bıyl kosmomonıtorıng sheńberinde 243 qoqys úıindisi anyqtalyp, onyń 197-si ǵana joıylǵan. Osyǵan baılanysty ekologııa departamenti Qaratal jáne Kóksý aýdandary ákimderiniń orynbasarlary men Alakól, Panfılov, Eskeldi aýdandaryndaǵy aýyldyq okrýg ákimderin ákimshilik jaýapkershilikke tartqan.
Ekologııalyq ahýaldyń jaqsaryp, aýanyń tazarýyna jasyl jelektiń de paıdasy zor. 2024 jyly oblysta 379,6 gektar jerge 1,5 mln dana aǵash otyrǵyzylyp, 3 myń 106 gektarǵa 15 tonna qara sekseýil tuqymy egilgen. 690 gektar aýmaq jerdi hımııalyq óńdeý jumystary júrgizilgen.
Eske salaıyq osyǵan deıin «Taza Qazaqstan» baǵdarlamasy aıasynda Jetisý oblysynda tazalyq aktsııasynyń jalǵasyn tapqanyn jazǵanbyz.