Jetisý oblysynda aýa raıyna baılanysty birneshe jolǵa shekteý qoıyldy

TALDYQORǴAN. KAZINFORM - Óńirde qalyń qar jaýyp, burqasyn saldarynan birneshe baǵyttaǵy jolǵa ýaqytsha shekteý qoıyldy.

Jetisý oblysy Tótenshe jaǵdaılar departamenti 2025 jyly 30 qańtar, saǵat 19:00-den bastap aýa raıynyń nasharlaýyna baılanysty (boran, burqasyn, kórý qashyqtyǵynyń shektelýi) oblys aýmaǵyndaǵy birqatar jolda barlyq kólik túrleriniń qozǵalysyna tyıym salynǵanyn málimdedi.

- Almaty – Óskemen – Qapal-Arasan (0–77 km) ; Saryózek – Kóktal – Qoǵaly – Kóksý – Qarabulaq (0–94 km); Kóksý – Balpyq bı – Qarabulaq – Qaınarly (28–67 km) joldary ýaqytsha jabyldy, - delingen habarlamada.

Sonymen qatar myna eldi mekenderge kireberis joldar jabyq: Qońyr, Kóktóbe, Kóshkental, Araltóbe, Onjas, Kaspán, Taldybulaq, Dolanaly, Qarymsaq, Qorjynbaı.

Tótenshelikter oblys turǵyndary men qonaqtaryna qolaısyz aýa raıynda qaýipsizdik sharalaryn muqııat saqtaýdy eskertedi.

Eske salaıyq, osyǵan deıin aýa raıynyń buzylýyna baılanysty eki oblysta jol jabylǵanyn jazǵanbyz.